將軍澳大叔疑打輸機發難 爆粗大鬧快餐店兼逼賠蘋果批 女職員高EQ應對獲讚

有將軍澳街坊上載多段影片，揭發區內快餐店發生一宗「蘋果批鬧劇」！片中一名大叔因蘋果批售罄，需等候10分鐘，其間坐下打機消磨時間；疑因「打機輸咗」，剛巧職員又提醒他取餐，竟將怒火發洩在無辜的職員身上，狂轟對方「扯起佢把火」、「嘈住佢」導致遊戲落敗，更荒謬地要求店方「賠多件蘋果批」！

閱讀更多：車Cam片｜沙田14歲單車男疑衝燈 遭P牌私家車撞倒 途人：飛咗上大銀幕！

首段影片可見，該名大叔站在取餐櫃枱前怒火中燒，面對女職員詢問「你而家係想點？」，他即時「發爛渣」高呼：「你而家扯X住我把火啊！我扯火啊而家！」；女職員表明想協助解決問題，大叔卻毫不領情並連珠炮發：「我話嚟攞嘢，好簡單，你同我講話無，要等1分鐘，我等，我坐喺度，好，我打緊機你（其他職員）喺度嘰嘰趷趷！嘈住我！打輸咗。嘈住我，催我攞！」女職員強調其同事態度友善，大叔仍爆粗反駁：「你唔好話友唔友善！你嘈X住我！我攞唔X攞（取餐）我有自由嘅」。

當女職員進一步詢問如何協助時，大叔竟提出「賠多嚿（蘋果批）囉」，女職員即追問：「點解要賠多嚿畀你先？」；大叔就理直氣壯地稱：「你遲咗無去攞啊嘛！我喺度等你啊嘛，啱唔啱啊，你叫我等㗎嘛。咪要賠囉，你做錯嘢！」女職員稱無做錯事，大叔再駁：「我嚟攞嗰陣時你無得攞呢，就已經係問題！我等咗十幾分鐘喇已經！」女職員後來走到櫃員機提出退款，大叔亦爽快地喊「唔緊要啊，退錢畀我」。

另外兩段影片可見，大叔面對女職員主動退款，竟突然轉軚，要求職員「重新炸」蘋果批：「你即叫即炸，你個蘋果批仲要……頭先我問你嗰時你話無啊嘛，即叫即炸嘛」；女職員解釋「即叫即炸好新鮮㗎喇喎，你想點先？」；大叔則堅持己見高呼「炸過囉」，女職員展現出極高情商表示：「等多6分鐘，OK？」大叔囂張下令，指不要叫他取餐：「唔好嗌我！我自己過嚟攞！我即刻數6分鐘」。

之後畫面再轉，女職員再次勸喻大叔冷靜，大叔依然死撐：「唔係我唔冷靜啊！我好冷靜啊」，並重申會自己取餐「我自己識嚟攞啊，唔好催我啊！」樓主事後補充：「（女職員）話退錢畀佢（大叔）但退唔到券，所以阿叔唔退。最後職員再重新炸過畀佢。咪又係要等」，兼在文中大讚女職員：「覺得個女職員好叻，無俾個阿叔兇到！」