:quality(80)/public/tvbcom/article/images/202508/961da868-9de2-4b32-8b83-64f830e6e6af.png)
有網友懷疑ATM提款險墮騙局？有網友在「大埔人大埔谷」FB專頁發文，指父親在太和廣場一部ATM提款時遇到怪事，留言：「今日聽到阿爸講，佢去提款，但前面有個男人喺個機撳完，但又冇攞到錢，之後行咗去隔離嘅舖頭扮睇嘢，但一直望住櫃員機方向，咁我阿爸已經留意到呢個人一直望住佢，之後我阿爸諗住撳錢，佢就發現點解個頁面會去咗轉賬度。」
樓主指爸爸以為撳錯掣，不以為意再查詢餘額，「但都係彈咗去轉賬頁面，之後我阿爸發現唔正常，就撳返張卡出嚟去第二到攞錢，而第二部機所有嘢一切正常，喺我阿爸離開嘅時候佢亦都見到嗰個男人行返去櫃員機度唔知睇啲咩。」樓主懷疑該男子有不軌企圖，「希望大家睇到呢個post之後，盡量留意一下同提醒一下老人家撳錢嘅時候隨時中招。」
貼文引起熱議，有人認為遇到異常情況，不應在繼續入卡，「張卡可能俾人讀咗，密碼亦都俾人影到。」、「既然你阿爸有懷疑仲去用？！咁可能人哋已經讀咗你張卡，同影低你撳密碼......」亦有網友認為非詐騙：「部機無現金提取就會係咁，直接轉去轉賬畫面，有提示不過可能佢冇留意。」
