公屋戶主欠債失蹤逾年 胞妹憂收樓欲轉名 一文看清房署指引

有港女發文呻爆，指其居住的公屋單位僅有她與胞兄的名字，惟對方「欠債走咗佬，冇係單位住超過1年」，事主曾報警求助並有報失蹤紀錄，亦曾向屋邨辦事處求助，但未獲正式立案。事主指兩年一度的公屋申報期將至，擔憂若胞兄不現身申報，房屋署有權收回單位，亦指「有試過搵佢，佢有覆肯申報，係唔知會唔會蒲頭」、「主任就係話如果佢唔出現申報，有機會收樓」。故發問詢問「想試轉戶主，叫阿哥遷出單位。如果阿哥唔肯填form，咁可以點做？」

閱讀更多：網民盤點最美公屋名 牛頭角下邨大玩藏頭詩 山景邨祝大家「安居樂業」

事主亦有留言交代單位背景資料：「間屋係我爸嘅，佢過身爭做戶主，我唔爭俾咗佢做，佢為咗攞租約去借錢走佬」。據了解，公屋轉換戶主或除名，一般需要原戶主簽署同意，在戶主不合作的情況下，其他家庭成員難以單方面完成手續。

不少網民建議事主應備齊報警紙、相關對話截圖等證明文件，向房署主任據理力爭，證明戶主已長期不在單位居住，以求酌情處理：「5月直接交表報佢唔係道住，主任自會處理」、「阿哥肯交遷出通知書仲好，阿妹直接申請轉戶主就得」、「要同房署講唔能夠完整做入息申報，原因係你阿哥失蹤。只要有報案紀錄，房署就好辦事」、「搵社工幫手」、「最實際問房署，有債主追數證明，有報案記錄，全部攞去房署問，房署會話你知」、「索性用追債理由，搏房署派一間比你，再等房署自己收舊單位」、「直鏟上房署總部」、「搵唔到佢咪好囉，報失蹤。房署會教你點做」。

根據香港房屋委員會的租務管理政策，如公屋戶主長期失蹤或未能履行申報責任，同住的認可家庭成員，應盡快以書面向所屬屋邨辦事處如實通報。住戶須主動提交具法律效力的證明文件，以確立戶主已長期遷出及失聯的事實；在原戶主無法親自簽署的情況下，家屬亦應要求房屋署介入獨立調查。