公屋婆婆擒水管離奇「吊吊揈」 鄰居苦勸不果反被嫌多事 網民憂危險：爆水喉就大鑊！

有網民近日分享「公屋奇景」，指新搬入對面單位的婆婆早前曾見過要坐輪椅、拐着兩枝柺杖出入；但如今婆婆無論中午抑或凌晨，竟會走到其家門外兼攜帶摺凳，攀上外露的水管，大展身手「吊吊揈」！事主在社交網發文：「公屋奇事-新搬入前面屋阿婆見過佢有輪椅，攞住2枝柺杖，但依家吾係中午就係凌晨，過黎我屋企門口上吊復康啊，真系有病，二十幾年樓齡水管係度上吊，斷左全層唔使用水啦，又做水舞間，最危險跌低，佢摺凳分分鐘將佢摺埋，要吊去公園吊啦。」又稱已向房署反映但未獲理會。

閱讀更多：九龍灣商場停車場 私家車霸4格電單車位泊車 網民轟自私：呢啲即時鎖車！

有網民問到有沒有試過和婆婆溝通時，事主表示：「當然有啦，對面戶已經鬧過佢，今日我鬧過佢，喺走廊捕獲佢出門口鬧佢，仲話我煩、收聲、唔好再講。」

有關影片引來網民熱烈迴響，留言：「千祈唔好搽啲膠水喺水管」、「房署職員唔理，你問佢咩名？同佢講會投訴佢」、「阿婆識玩呀」、「自己屋企條水管唔吊，係要吊你嗰支」、「Send條片去東張，俾全港市民睇到」、「由佢吊，有事爆水管，叫房署claim佢同取消戶籍仲好」、「屋企人睇左視頻，做同樣動作，跌到骨裂！」、「跌親好大鑊」。