臥底嬌娃｜關曜儁犧牲保護馬貫東催淚爆燈 結尾一句整喊網民嗌不捨

當朱皮營救奕風時，遇到世豪，對方看見他私下營救奕風非常憤怒，更即場毆打他，不停對其拳打腳踢，打到朱皮頭破血流，傷勢嚴重。

世豪聽到警車聲想逃離現場時，朱皮以僅存的力氣捉着對方隻腳，不讓他離開，表示「風哥先係我大佬」， 世豪再不斷毆打他，朱皮也不放手，終打到他暈倒。

妙姿趕到現場後，即叫朱皮要「頂住」，隨即以黑白色播放了昔日朱皮與妙姿相識的畫面，以及與奕風兄弟情回憶，最後朱皮更說出「我之前冇得揀 ，我依家想揀做個好人 」作結，場面催淚。

大批觀眾看畢後也指這集非常感人，極為催淚，又指對朱皮的犧牲感不捨，紛紛表示「點解朱皮要死呀？好慘呀！」、「朱皮真係當奕風係大佬」、「睇到我喊晒，呢集好感動」、「朱皮你係好人嚟㗎！」

關曜儁接受tvb.com獨家訪問自言拍攝這場時十分緊張，「因為杜燕歌真係攞支真嘢打落嚟，雖然打唔中 ，但我都會驚 ，所以我全程閉眼係因為我好驚畀人打到。」

他又指拖走阿東離開時發生趣事，「因為講我要被阿瀅偷聽，所以我個電話放咗喺衫袋，點知拖拖下個電話跌中阿東個頭，都幾搞笑。」

劇中他與馬貫東和陳瀅最多對手戲，關曜儁感激兩位拍檔的信任，不斷鼓勵其嘗試，令到出來效果更好，「同阿東合作好正，佢好快就會知道你想做嘅嘢，大家好多時喺冇夾過嘅情況下，做到give and take個感覺，大家好信任對方，正正因為有呢份信任，先會出到咁嘅火花，感覺好奇妙。」

他續說：「我同阿瀅都係會傾，睇吓咩角度會令到整體感覺更好，我哋會夾好多唔同嘢挑戰導演底線，佢同樣係好信任我，叫我放膽去試，所以我好感激有呢兩位拍檔幫助我，令我嘅角色更加出。」