游嘉欣獨家專訪｜游嘉欣認內向怕被拒絕 愛情不強求享受獨處：冇特別渴望想識其他人

今次在《非常檢控觀》中演的白逸桐性格豪爽又有江湖味，與她過往的角色大不同，游嘉欣坦言感到興奮，全因作為演員望令觀眾感到不同的變化，一直渴望撇甩「乖巧」的標籤，「我天生個樣望落去比較乖巧、文靜類型，但我真實性格思維比較跳脫唔係好正經，我亦都唔係只會讀書，同樣熱愛做運動」。

正正全因外表的關係，她直認局限角色發展，唯有靠自己作出改變，令大家見到其不同一面，「除咗入行第一套《香港愛情故事》做活潑機靈嘅女生比較貼近我，之後都係文靜嘅角色。所以，既然外表冇得改變， 我會分享多啲自己嘅日常生活畀大家睇， 好似我鍾意做運動就會甫多啲上網， 希望大家留意到我都有活潑好動嘅一面 。」

劇中她與吳偉豪演一對歡喜冤家，二人的鬥嘴戲深受觀眾喜愛，被封新一代營幕CP。不過吳偉豪早前受訪時指拍畢此劇後，與她再見面時顯得甚為冷淡，游嘉欣解釋對異性向來較為避忌，全因很怕會傳出緋聞或任何是非，又自認自己不懂打開話匣子的人。

「嗰次Ricco同我打完招呼後就冇講其他話題，我又唔係好識延伸話題嘅人，所以就算平時其他人我都只係微笑點頭就走，唔叻再講多啲嘢。」

她直認個性慢熱兼不主動與人聊天，在娛圈發展較為蝕底，故一直慢慢調整自己的性格，「我好驚被人拒絕，因為我都係比較敏感諗好多嘢嘅人，好容易放大咗對方不經意嘅舉動，令自己腦入面有好多小劇場，所以依家都調整緊呢個性格。」

而且，她深明此性格會有礙工作，更需要作出改變，「好似我哋每次轉一個劇組就會遇到一班新嘅人，如果我性格咁慢熱，真係會令件事氣氛冇咁好，亦難同對手培養默契，所以依家會盡量主動同人傾偈。」

乖女形象深入民心，很多人也關注其感情狀況，惟游嘉欣依然享受獨處的時光，更直認社交圈子窄，對愛情隨遇而安，「我未入行前，真係除咗同自己玩開嘅朋友玩之外，我同其他人都唔係好接觸同交流，我又冇特別渴望想識其他人，好享受自己一個人做嘢。當然我都有諗過點樣識男仔，但之後我又覺得緣份到就會到，唔使太強求。 」

不過成為演員後，她坦言情感上需要多點經歷豐富自己的感情，全因她向來情感偏弱，內心永遠十分平淡，對做戲而言絕不是好事。

「我內心係好平淡嘅人，冇咩高低起伏，亦都唔識得表達自己嘅感情，所以喺未入行前我睇電影劇集，所有感人嘅情節都唔會喊，但入行後我就逼自己睇戲時要嘗試感觸令自己流淚。」

因此，喊戲對於入行初期的游嘉欣是一大難關，慢慢透過磨練和經歷，逐漸打開了自己的感情「機關」才哭得出來，最重要其明白到不要怕將自己的情緒展露出來。

「開頭真係好難，同埋要我公開喺咁多人面前喊真係唔得，我會即刻收番晒啲眼淚，依家學識投入咗個角色，感情就會被觸動，喊戲相對易過以前，慢慢有進步。」

入行轉眼8年，游嘉欣被很多人幸運，不但機會多多，第一套劇集《香港愛情故事》已經有角色名，更佔有不少戲份，回想當刻，她直言意料不到，並將壓力變成動力，做好每一場戲。

「最初我以為得幾句對白，但當收到劇本發現咁多對白同埋個角色幾重，當然係有壓力，但幸好當時監製好幫我。我覺得暫時係自己嘅代表作之一，我亦都好鍾意個角色，因為好接近我性格，好似將自己嘅人生寫照搬咗出嚟。」

雖然她入行5年已奪得「最具潛質新人獎」，在眾小花中被睇高一線，惟游嘉欣從沒有飄飄然的感覺，反而踏實做好本分，不斷努力裝備自己。

「我從來都唔覺得自己有起過，我覺得係平穩階段，不斷學習緊，例如喺未有工作嘅時間，我會保持做運動同學習新知識，好好裝備自己，唔好令自己原地踏步。」

作為藝人心理的調節是首要面對的課題，就如初入行的她屢被批臉圓圓，並不合符標準的「上鏡樣」，惟游嘉欣自言一直做很多運動，「由細到大我都係田徑同排球隊，我睇番以前真係Baby Fat，但只係塊面好漲個身都瘦，不過啲人見你上鏡塊面就會覺得你個身都肥。」

她坦言曾因外界的評論，一度過度節食，望摵走Baby Fat，以致身體出毛病，「嗰時我一路開劇，但唔食碳水只食菜，又狂做運動加上睡眠不足嘅關係，出現女仔好容易有嘅荷爾蒙問題，荷爾蒙又會導致肥胖。」

直到某刻，游嘉欣突然清醒，明白到不應為別人而活，在意外界的感受而傷害自己的身體，慢慢找到一套適合自己的方法，經過時間調理後，身體才逐漸好轉。