死有對証｜陳曉華知性眼鏡Look演女法醫 強迫症上身摷逾10袋垃圾排骨頭 自爆為入戲每日逼自己做一事

首集劇情講述，一直懷抱法醫夢的程芷昕（陳曉華飾）如願成為女法醫。怎料第一天上班就碰上棘手案件——垃圾站內驚現人肉屍塊！作為新人的她獲派重任，要在十幾袋垃圾中搜查其餘人體組織， 難度頗高！

自小患有強迫症的芷昕，無論生活還是工作都抱以嚴謹態度。劇中不少細節均顯露無遺，例如她見到對方衣著不整會直接上手幫忙扣鈕扣，物品必須擺放整齊、吃飯時會將紅蘿蔔一一挑出等，而這一特徵在她摷垃圾袋搜證時更發揮得淋漓盡致！

芷昕一絲不苟地將雞骨、豬骨等骨頭排列得整整齊齊，不放過任何一絲尋獲人骨的可能，當被重案組警員高俊（馬貫東飾）質疑專業時，她有條不紊向對方解釋：「排得清楚啲，睇得清楚啲，咁就唔會撈亂咯，再有啲我唔確定嘅，再拎返去做檢查。法醫唔係科學，用肉眼唔能夠做到百分百嘅確定，所以要拎佢哋返去切成薄片，放喺顯微鏡下再觀察」。