正義女神｜佘詩曼譚耀文演繹真摯夫妻情 暈倒場口花絮曝光超敬業

惠知則坦言：「我個腦有條血管塞咗，醫生話要做手術。」

聽到惠知的病情後，光正冷靜控制自己的情緒，並問她醫生有否指何時要做手術，惠知即隱瞞病情表示「3個月內要做」。光正既憂心又勞氣表示：「點解你到依家都唔肯講，要我逼你先肯講嘅呢？咁大件事係條命嚟，我哋屋企人嚟，你有咩事走咗，咁個女點？」

當光正叫她請假休息時，惠知依然記掛工作即表示：「非法處理屍體案好多疑點，我一定要自己審番，好緊要」。因此兩公婆發生爭論，光正非常勞氣說：「你係咪傻㗎？你依家條命有事」但惠知堅持要審理，「你畀我審埋先啦」。

這幕簡單場口，不少網民指阿佘和阿譚的夫妻戲好好看，並指二人演繹得很有夫妻感覺，甚至有網民非常入戲表示「言官真係要停落嚟休息」、「光正快啲追番個老婆啦」、「言官你要好好愛錫自己」。

另外，阿佘暈倒的幕後花絮曝光，見她連跌幾次只為令畫面完美，而且，原來譚耀文拍攝大頭拍醒阿佘時，他乃是對着空氣演戲，依然表現投入。

佘詩曼與譚耀文相隔逾20年再合作，由情侶「升呢」做夫妻，二人默契依然，阿譚早前接受傳媒訪問對於這位舊拍擋有讚無彈，指對方與多年前一樣沒有變，「一樣很nice又玩得，工作時可以很強，但又可以很sweet，是很好的合作夥伴，她變得更人情世故，處理各種事情都真的很好、很成熟。」