執法者們｜蔡潔與黃宗澤合作8次首演夫妻 自爆一細節令Bosco喊得勁淒涼：今次我特登設計

對於8度再與黃宗澤（阿波）合作，二人默契十足，蔡潔接受tvb.com訪問直認此角對其甚有挑戰性，與黃宗澤一開場已充滿火藥味：「今次一開場就講我哋離婚，同埋何天茹嘅性格係一個好倔強嘅人，因為呢個女子喺佢工作當中已經係非常有原則，甚至喺職場上都冇朋友，但佢就將呢種嘅個性同埋態度都帶咗返去佢嘅家庭生活入面， 所以就變咗佢同老公嘅溝通係無效。」

她直認何天茹的角色是不解風情的女子，「今次呢個演繹我要收埋一啲平時同阿波玩嗰種感覺，反而係要壓制大家平時玩嘅氣氛去做，所以我覺得呢次大家合作感覺好唔同。」

蔡潔坦言此角甚有挑戰性，要演繹不同的狀態：「 因為何天茹整體而言，都係周俊傑其中一個核心人物，我哋中間經歷好多嘢，之後去到某個階段之後，因為太太嘅事情，周俊傑要吃好多苦，雖然我唔算太大篇幅，但我要喺咁多集入面演由一開始係離婚狀態跟住大家中間和好，之後再有轉變嘅狀態，對我係好大挑戰。」

至於談到早前黃宗澤看劇本有關二人的感情，已經看到流淚，對此蔡潔自言可能因已投入在劇中角色比較硬淨，又指是次特別設計細節，令黃宗澤喊得更淒涼：「以前我哋合作都事前夾橋，但今次我有啲保留， 喺夾嘅時候唔會同阿波夾晒， 我會諗下點令佢再喊得淒涼啲， 我諗佢都感受到，因為為講出嚟就冇第一次聽嗰種感覺，所以我決定唔講出嚟會有爆肚，咁我見佢喺跳拍場口都喊得好淒涼 ，拍出嚟大家都覺得滿意 ，我覺得好開心。」

她又指與黃宗澤多次合作，大讚對方是好前輩，「從我喺飛虎2認識佢第一次合作嘅時候， 我已感受到呢位前輩係好尊重同信任對手，佢可能有時見到你喺某啲嘢唔識做嘅時候會提你， 但大部分佢都係等各人發揮自己對角色嘅理解去做，睇大家撞出嚟嘅效果係點。」

蔡潔自言在劇中見到黃宗澤、陳豪和馬明的專業精神，令其成為學習對象，更望自己做得一次比一次好，「以前我只係諗住當接前輩對手戲嘅時候，唔好做衰咗咁就可以，但隨着時間過去我對自己要求會高咗，諗下有冇咩可以畀到對手，因為我唔想每次只係由對方掟出嚟令整件事更加豐富，我希望自己都可做到，好似今次阿波角色會以太太為先嘅人，所以我會lead住我哋情感上面起伏嘅戲 ，等阿波放鬆去演，唔使兼顧太多。」