佘詩曼獨家專訪｜貼地氣零偶包自爆最愛排隊食好西 演戲迷惘期未想過轉行 ：邊有人永遠喺高位

相隔兩年佘詩曼在《新聞女王2》再演Man姐，在別人的眼中角色那份「强」就如其真人一樣，她直認與Man姐一樣有主見和判斷力強，而不同的是沒有她那麼惡和現實中她深明生活的重要，不會只有工作。

即使Man姐形象深入民心，她不怕被標籤為女强人，局限自己的角色之路，「因為演唔同角色就會有唔同感覺，可能呢期有兩輯Man姐，所以先會畀人有個咁嘅形象，好似好多年前啲人都會問演咁多古裝怕唔怕變咗古裝人。其實呢個都係一個過程，當你遇到另一啲角色呈現畀觀眾，觀眾又會有另一種感覺，所以我唔驚。」

今輯Man姐由電視台轉換跑道到網媒，有所變化，正如她當年離巢外闖，放手一搏，除望感受生活自己一嘗計劃人生外，原來當時她亦處於人生的迷惘期。

「攞完第一次視后後係有迷失，因為唔知道仲可以向咩目標進發，好似個人冇咗個目的地，所以嗰時都質疑過自己應該要點做，開始諗係咪應該出去睇下呢個世界，同一啲唔同嘅團隊合作，令自己同觀眾都有新鮮感 」佘詩曼說。

她直認當時這個決定深思熟慮了兩年，終決定放手一搏，「當時真係好搏，因為喺出面除咗一間公司會簽之外，其實係冇任何project喺手，所有嘢都係未知。」

但當下了決定後，她就勇往直前，即使結果是怎樣也坦然接受，不過她回想外闖初期並非一帆風順，首次面對的難關便是學懂調節心理的落差。

「初頭都唔係順利，只係1年1部劇， 但以前係1年5部，喺TVB入面好多監製想用你開下一個戲， 但突然間變咗冇人搵你，嗰個落差真係好大，我仲係高位走，所以突然間咁變，簡直係自我懷疑得好緊要，當時會諗點解冇人搵我拍嘢，係咪啲人唔鐘意睇我？唔記得我？係咪我已經冇市場價值？覺得自己係咪冇以前咁好呢？」

即使曾經歷自我懷疑，工作量大減，她亦從沒有想過轉行，反而冷靜地思考和分析事情，「我只係諗點樣解決呢個問題，我亦唔會理想化件事，明知道行出去就係要冒險，咩嘢畫面都諗晒，所以唔會突然間走去轉行，同埋嗰時係熱血期，一心諗住出去闖 。」

她指從不會想最差的情況，「最差咪拎住自己副身家用到老，但我唔相信係咁，點衰極都會有嘢拍。」

正正有如此大的落差，佘詩曼自言由那時開始學懂調節心態，自我修復的能力也變得愈來愈强，「我本身個人都好樂觀，但當你冇遇到任何問題嘅時候 ，你唔會識得啟用嗰個Mode，當你遇到可以話當時嘅低潮、迷惘期，你咪會學識點樣令自己Move On ，唔好浪費時間。」

然而那段等開工的日子，她沒有自我沉淪，把握時間增值自己，檢視不足的地方，「我嗰時喺屋企睇好多戲，擺多啲嘢入腦，令自己個資料庫厚啲，亦都係嗰時開始識得吸收人哋叻嘅嘢或者去感受生活。」

人總會累，難免有想放棄的時候，佘詩曼直言只在腦海飄過半刻，「嗰時最後一日埋尾一定要chur晒去，拍咗30幾40個鐘仲未收工，體力上頂唔順嘅時候，就會諗其實我都係一個女仔，點解我要咁辛苦㗎？」

但當拍攝完畢，她很快便忘記那份辛苦，只覺得很開心完成一個作品。

正正這份對演戲的熱愛從不減退，保持心中的那團火，成為其最大的力量，不斷向前行，成就她演繹無數經典角色。只要提到演戲其那份雀躍表露無遺，足見她很愛做演員，這份滿足感什麼也取替不了。

「每次接到劇本嘅興奮都係同以前一樣好開心，嗰份開心形容唔到，如果可以接到一個好角色或者睇到好劇本，我嗰個興奮程度係比任何嘢都高，證明我真係好鍾意呢樣嘢。」

在這行打滾了28年，在外界眼中佘詩曼不斷再創高峰，每次也令人看到精彩的「華麗轉身」，對她而言從不會想太多，只專注自己的本分，活在當下，「我控制唔到個結果係點，只可以控制我做緊嘅時候點樣投入去演呢個戲， 做好呢個project。」

生命的意義在於有限；生活的色彩在於悲喜，她深明不會有人永遠在高位，放得開看得透便是其人生態度，「只要你覺得高低係常態就唔會有問題，邊有人永遠喺高位，你要有高與低先會進步；你要失去過先識得珍惜；衰過先識得叻。即使衰咗我都唔會後悔，因為係我自己決定，咪下次再做好啲。」

佘詩曼在工作上從不會限制自己，最重要自己喜歡為先，私下的她同樣想做就做，不會因藝人的身份有所包袱，視自己為一個普通人，「例如我想食雞蛋仔就排隊買；想食燒賣又去買，我唔會神化自己。」

「我好鍾意感受人間煙火，專揀一啲要排隊，因為要排隊就一定係好味。」她笑言。

她自爆最長曾排了一個多小時，認為這是體驗生活的一種，從中可以觀察眾人的行為，「因為演員係靠觀察同埋演生活，所以生活係好緊要，若果你永遠將自己收埋喺一間房，就咩都睇唔到。」

至於今次在《新聞女王2》中她與養母夏文汐關係又愛又恨，每次見面也火星撞地球，觀眾看得過癮，佘詩曼指與對方是缺憾美，「兩個人都好強，我係佢嘅翻版，由細到大都係睇佢頭，我覺得可以反映到現實中有好多呢種關係，不論母女、父子也好都係口硬心軟，大家心裏同樣是愛錫、欣賞、崇拜對方。」

現實中她指由細到大與母親如朋友一樣，相處融洽，其一直很放任和支持她做所有事，大家永遠有商有量，是其最好的朋友和人生導師。

「佢會同我分享人生經驗，有咩試過撞板會話畀我聽，希望我唔好重蹈覆轍。」

佘詩曼父親在她5歲的時候意外離世，母親獨力照顧她與哥哥和弟弟，她在母親身上學懂堅強，同時感激對方帶其來到這個世界，開展人生美妙的篇章，「我感激佢帶我嚟呢個世界，等我可以體驗、學習、進步，呢個旅程好奇妙同埋學咗好多嘢，我好珍惜一生嘅苦與樂。」

早前母親患病，令其擔心不已，她透露現時對方身體狀況可以，惟工作忙碌的她，不時香港內地兩邊走，自覺陪伴母親時間不足，惟對方從來沒有任何怨言，默默支持女兒的工作，「佢成日都話有嘢做梗係好，最緊要做自己開心嘅嘢。」

她反笑母親行程同樣排得滿滿，「其實佢都好忙，有好多街要去，都唔理得我咁多，咁都係好事，有精力先可以出街。」