TVB小劇場｜《死有對証》馬貫東挑戰情侶「送命題」 直男神回一秒辣着女友王菲

依片可見，悉心打扮一番的王菲向男友拋出情侶間的經典「送命題」：「我今日有咩唔同？」「福爾摩斯」上身的馬貫東，立刻拿出一疊女友的日常手繪畫像作對比。

正當他自信滿滿回答「靚咗」，以為能順利過關之際，王菲隨即追問：「咁我邊度靚咗啊？」他竟直男式神回：「冇咁水腫，尤其係塊面！」一秒激嬲女友：「即係我尋日好腫啦！？」

不料馬貫東完全未懂收口，更火上澆油道：「你前一日仲腫啊」，當場辣着女友，令王菲憤然離去，非常搞笑。