/public/tvbcom/article/images/202610/73162c86-e747-4636-9f05-7226de0c15f9.jpg)
tvb.com繼早前推出1分鐘小劇場，將熱播劇集角色延伸至互聯網後，再趁萬聖節搞搞新意思，找來《愛‧回家之開心速遞》鐵膽演員齊齊拍片應節，推出一共四集的萬聖節特輯《接龍保安心慌慌》驚慄小品！
劇情圍繞「保安新丁」艾頓壯（焦浩軒飾）加入保安部跟隨「王朝」（莫家淦飾），並接二連三遇上離奇故事或事故，令接龍保安部全線心慌慌！幾經轉折，最終竟揭發連串怪事背後竟與清潔部群姐（許思敏飾）有關。
延伸閱讀：愛回家之三代同糖｜「聲夢小花」劉芷君驚喜客串售貨員 出場幾分鐘憑靚樣搶Fo 網民讚愈大愈靚女！
一連四集的TVB驚慄網絡小劇場，主題分別為「不要不信邪」、「深夜保安練習」、「生猛女保安」及「群姐講鬼故」。劇情不但離奇詭異，同時亦卻夠晒生活化，保證有共鳴！
tvb.com今日（29日）凌晨推出第一集「不要不信邪」，劇情講述焦仔第一日返工原本開心又輕鬆，更將前輩莫家淦的「呢度返夜，話冇咩就有咩」、以及「切勿踏足禁忌之房」的叮囑當做耳邊風。
就在焦仔掉以輕心開心巡更之際，男廁燈突然應其要求暗變光、「禁忌之房」又離奇傳出連串怪聲及房門離奇打開、而原本冇嘢出的汽水機，亦因焦仔吐槽湧出大量汽水及樽裝飲品！而被嚇窒的焦仔，則上演了一幕「心慌慌樓梯狂奔」，畫面和劇情均十分過癮。
群姐係Big Boss？
另邊廂，原來莫家淦之前的所謂叮囑只是想嚇吓焦仔，當他見到焦仔嚇到三魂唔見七魄時，自然笑爆嘴。但正當莫家淦得意之際，鏡頭突然驚現女鬼手，畫面相當驚嚇。到底呢兩位保安真係撞鬼還是另有內情？二人加上生猛「新丁女保安」張天妮，又會搞出甚麼笑料？而在第一集尾段才出場，責怪焦仔沒有加入清潔部的群姐，又是否幕後Big Boss？密切留意未來接連三日推出的《接龍保安心慌慌》系列。
為響應網絡文化，tvb.com相關系列採取「刀仔鋸大樹」拍攝方式，負責拍攝的幕後同事全程只有兩位，既要負責度橋、寫劇本、宣傳策劃及指導演員，又要包攬收音、打燈及拍攝等不同工作，相當符合現代人追求的低成本經濟效益。雖然小本製作，但官方發布的四張短劇宣傳照卻相當認真，有晒Design，誠意十足！
