馬國明獨家專訪｜馬國明被太太「調教」學識情趣製造驚喜 爆曾發火同導演鬧交：嗰次都同佢撐得幾行

馬國明在加拿大修讀機械工程學士，畢業後並非一心想做演員，在無數的求職信中唯獨只有訓練班有回音，無心插柳下展開其演藝之路。

2000年參加第14期訓練班入行，他並非一來就當主角，由低做起，最初也演了三、四年跑龍套的角色，包括死屍、嫖客、士兵、路人甲乙丙等。

「我記得喺《洗冤錄》做足7日死屍，又喺《男親女愛》嘅MV扮小強彈魚骨結他；之後喺《皆大歡喜》亦做過十幾個角色，呢場黐上鬚、下一場黐下鬚、再下場又帶帽；我又試過喺《兒歌金曲頒獎禮》扮過一隻大蝴蝶。」他憶述。

回想昔日這些角色，馬國明自言從沒覺得辛苦以捱的心態返工，反而每天都覺得很充實，全因每日都有不同的東西嘗試。「就算做士兵無對白都好，都有啲動作要做，我又試過喺TVB拍嗰啲神仙劇入面扮妖精，第一次吊威吔，喺個天度揈嚟揈去，所以我嗰時剩係覺得好好玩。」

即使做了三、四年這些的小角色，收入微薄，其父母從沒有擔心過問，放任讓他做自己想做的事。

「我記得讀訓練班嘅時候係2000幾蚊一個月，訓練班畢業就4000幾蚊，所以嗰時都冇錢使都係搭巴士返工，慳慳埋埋啲錢，加上我又同屋企人住，咁就食屋企，幾千蚊都夠使。」

雖然父母從沒有過問其工作狀況，惟愛子心切的母親眼見兒子冇錢用，她會偷偷地塞錢放入他的銀包。

自小與母親關係要好，馬國明會與對方傾訴心事，反而因父親是嚴父，所以他小時候比較怕他，總是黐着母親。他指父親傳統有威嚴，對子女的愛從不說出口，而由行動做出來。

「我阿爸係超級慳，從來都唔會使錢喺自己身上，一件奢侈品都冇買過畀自己，但我哋三姐弟要讀書、學嘢，嗰啲錢佢就好大方畀出去。」

直到他長大後有能力，馬國明送父親一隻靚錶，即使父親沒特別說甚麼話，其實暗自歡喜，開心兒子如此生性，「我記得我阿媽隔幾日同我講，佢話我阿爸細細聲問佢：『乜個仔依家都搵到啲錢咩』」。說完便哈哈大笑。

家人的愛錫和信任，讓他無後顧之憂做喜歡的工作；同時因為家人成為其努力工作的推動力。他自認個性傳統，加上其父親在50多歲便退休，從此肩負照顧家庭的責任。

初入行的馬國明演技差，幸好身邊遇到不少前輩提醒幫助，其中一位是已故藝人許紹雄，對方曾以粗口大罵他，令其當頭棒喝，即使相隔多年，他仍心存感激這位好前輩對其的愛錫。

「我扮足7日死屍嘅戲就係做Benz個仔，嗰時我乜都唔識，啲位行錯、唔識睇鏡就燈，又多NG，Benz日日同我食飯就鬧我。佢同我講：『你情願我依家鬧你，定係套戲出街嘅時候啲觀眾鬧你。』嗰下真係好窩心，我覺得呢個前輩好好，因為佢係錫我呢個新人先會咁緊張，所以嗰時畀佢鬧甚至用四字問候都好開心。」

除了在演戲上獲得許紹雄傾囊相授，對方做人的生活態度，亦令馬國明欣賞不已，「Benz係我偶像」。

「Benz做人好瀟灑，佢成日話『你哋啲主角同一個時間拍一套戲，我就同一個時間拍三套戲，仲可以出去撈埋電影；我呢啲配角拍完就可以走又唔使做訪問，不知幾開心』我好鍾意佢嘅人生哲學，唔一定要做主角，咩都睇得好透。」

無疑地，馬國明在演藝路上十分幸運，只做了三、四年跑龍套的角色後便遇上《衝上雲霄》的「高志宏」，是他一個重要的里程碑。這次是其首個角色貫穿全套戲，當中更不乏好戲之人，吳鎮宇、馬德鐘和陳慧珊等。

面對一班實力派前輩，他自言從沒覺得害怕，開心能夠不斷從他們身上偷師。「佢哋好友善，同埋每日同鎮宇哥開工係好玩，你見到佢做咗好多準備，一場戲會有 4、 5個想法，呢個唔得就換另一個。我哋以前邊度識，搞掂自己嘅對白都已經偷笑，唔好咁多NG，仲點會諗點樣演，所以喺佢哋身上學到好多嘢。」

馬國明在這部戲嶄露頭角，更與黃宗澤、吳卓羲和陳鍵鋒被捧為「S4」，工作機會不絕，可謂被公司力捧，但他竟笑言「我嗰時又唔覺得公司捧緊我」。

「因為我S4嗰時都仲係普通一個藝員合約，即係公司一路都未轉我做經理人約，同埋嗰時其他劇組PA仲會call我去做門口兵。」

即使當刻仍未變成「親生仔」，他絕無不快，全因每天工作排得密密麻麻，對其而言只覺得十分幸福。「我哋晚晚都跑四個廠，跟住第二朝晨早又出去拍綜藝。我嗰時一年簽96個Show，但我每年係做百四五個Show，做到爆晒Show，所以我哋好開心。」

他笑言當時經常周圍𢱑撈，還忙過那些主角，「我哋喺呢個廠拍完，行行吓，突然間隔離廠話：『喂！過嚟撈個角色啦！』咁又執一個show，所以我哋忙得好緊要，真係忙過啲主角，主角收咗廠返去瞓覺，我哋第二朝仲要去開綜藝節目。」

看似一路上一帆風順，馬國明也曾被外界狠批演技差，指他做戲不自然、說對白像讀書。即使飽受抨擊，他從沒有介懷，除了檢討自己的問題，努力磨練演技外，其他的負評也看得開，不會放在心上。

「演技係好主觀，佢可能本身唔鍾意馬國明個樣，咁佢就唔鍾意睇馬國明，所以我又覺得冇乜所謂，係好正常嘅事，人夾人緣。我自己睇戲都會有特別偏好某啲演員，有啲演員就算攞咗獎，我都覺得佢麻麻地。」

毛毛蟲要靠己力破繭而出，才能變成蝴蝶。人要不斷努力，才能成就自己。他用實力一步步令觀眾刮目相看。2010年的《鐵馬尋橋》演「顧汝棠」一角，是他的轉捩點，「開始有觀眾覺得我做得幾好」。

2012年他在《On Call 36小時》首次擔正當男主角，演出備受讚賞，更憑此劇首奪大馬視帝。他謙虛指只因劇本寫得太好，「我好好彩撞到一件頭呢個角色，都只係順住個劇本去做。」

馬國明指那時仍未覺得自己做得好，對劇本上也沒有太多的想法，「我諗去到《心理追兇》開始有多啲諗法會同監製傾，睇吓點樣擺落角色度。」

多年來他不爭不取，個性隨遇而安，在入行19年後才奪得香港視帝，他坦言從不介懷獎項，並沒視奪視帝為目標，老實大方直認「我介意搵唔搵到錢多啲」。

「香港好現實，我依家要養兩個家庭，梗係錢行先。如果你畀個獎我搵唔到錢，咁冇乜用。」

而且，他自言在2012年已奪大馬視帝，因此不明為何外界要區分得如此仔細，「你問我每一個地方嘅視帝都係視帝，邊個地方只要係一個男主角獎，其實都係一個開心事，都係一個肯定。」

外界公認的好好先生，出名脾氣好、性格隨和的馬國明，原來年輕也有火，曾與導演爭執。「我有次喺藍田石礦場拍古裝外景，套戲講旱災我哋條村半年冇落雨，但嗰日落緊毛毛雨，導演死都要拍，我話點拍呀？嗰時後生好易忟，真係會同導演嘈，我記得嗰次都同佢撐得幾行。」

隨着時間成長，人變得圓滑所有事再沒以前執着，「依家就算導演有啲好唔合理嘅要求，自己都可以化到，搵個方法令到件事大家舒服啲。」

但馬國明直言從不會對新人發脾氣，即使對方頻頻NG也好，全因他也經歷過新人的階段，明白當中的辛酸，也試過拖累大家收工，惟當時很幸運遇到另一個好前輩羅嘉良（撈家）的體恤。

「我拍《創世紀》同撈家合作，做幫佢炒股票嘅角色。有場戲我要同佢講一大埋股票對白，但啲對白係臨開廠先飛紙仔畀我，嗰場戲我NG咗好多次，你見到撈家已經攰到好似十日冇瞓覺咁嘅樣，但佢依然好好脾氣同我講『唔緊要，慢慢嚟，慢慢講』我曾經都受過呢啲恩惠，所以我依家又點會鬧啲新人，會秉承撈家嗰套，好有耐性咁慢慢等佢做。」

入行26年他遇過不少角色，並非每個角色也有很大的空間發揮，惟他自言不論是做主位還是輔助的角色一樣開心，皆因其深明現時觀眾的要求較以前高，故要拍到一套爆的電視劇並非易事。「我拍《新聞女王》都好開心，雖然個主位唔係我度，但可以拍到一套觀眾鍾意又咁爆嘅戲，你有份參與都已經好有成功感。」

他坦言演員是需要配合套戲，當遇到輔助的角色，便做好本份，不應搶戲，這是其由訓練班開始學懂的道理，「拍戲係一個teamwork，嗰個空間係你嘅時候就去做；嗰個空間係人哋嘅時候就留返畀人哋。」

「每個戲佢寫咗個重心位喺嗰度，大家就一齊去做嗰個重心位出嚟，如果大家都去搶住做套戲就好亂，搞到觀眾唔知睇邊度， 好似《新聞女王》 剩係睇Man姐，大家就睇下點幫Man姐，令到Man姐做得最好畀大家睇。」

事業上馬國明默默耕耘，踏實行每一步，走到現時一線的位置，感情上他同樣按照自己的步伐，尋尋覓覓最終找到對的人。他與湯洛雯於2023年拉埋天窗，結婚轉眼3年，馬國明談及太太時，依然一臉甜蜜表示「佢成日都令我好Sweet 」。

「我老婆好搞笑， 佢好有表演欲，成日喺我面前做啲嘢都好好笑，例如佢會突然模仿啲人、扮啲聲、有時扮兩隻貓一啲表情， 我都覺得佢扮得好似。但可能TVB畀佢演嘅角色都係靚女、純純小白免，未撞啱一個角色啱佢演，所以佢發揮唔到呢一面。」

他直言婚後也沒太變化，皆因與太太同是黐家的人，享受在家中共處的時光。不過兩個人相處總會有磨合期，馬國明指也是正常的事，最重要的是大家互相遷就，因為「愛」不知不覺也被對方影響。「好似我以前從來唔畀人喺我架車度食嘢，但我老婆就好鍾意喺架車度食嘢，慢慢令我覺得冇咩所謂。」

對着自己最親密的人，顯露最真實的情緒，馬國明坦言與太太當然也曾鬧交，惟大家去到某一刻便會停低各自冷靜。

「大家隔一陣落咗度火，就會傾番件事。我同佢都係咁樣嘅人，後尾再傾都係啲芝麻綠豆嘅事，所以只要你嗰刻冷靜落嚟，唔好再罵上去， 唔好講啲傷害對方嘅說話，好快就冇事 。」

他指各自也會氹對方，「有時我老婆發小姐脾氣，事後佢會同我道歉；有時男仔脾氣唔好為啲芝麻綠豆嘅嘢反應好大，我亦會道歉。」