非份之罪｜何沛珈劉佩玥姊妹情濃 親爆拍攝初期有憂慮 感激阿Moon暖心扶持：每次見到佢都覺得好溫暖

講到葉麗恩（何沛珈飾）與文雅淇（劉佩玥Moon飾）為好姊妹，麗恩一直不喜歡有方（阮浩棕飾），因此想好姊妹盡快放低對方，所以早前帶雅淇拜姻緣石，望對方覓得良人。當得知雅淇拋寳碟的內容依然心繫有方，麗恩忍不住表示「文雅淇，你做乜仲掛住個渣男呀？」

今晚（29日）一集，麗恩得知雅淇竟然有意想與有方復合，更是激動又勞氣地怒斥：「佢會累死你㗎！呢條友信唔過，你係咪畀佢電到傻咗呀？佢根本唔會變，你冇得救㗎喇」完美演繹出閨密那種「恨鐵不成鋼」的焦急。

今次與劉佩玥演好姊妹，何沛珈接受tvb.com獨家訪問坦言初時感到擔心，全因對方是大馬視后，「嗰時對佢會有種尊敬嘅心，但同佢接觸之後，我發現佢根本就係一個傻大姐，我哋兩個有好多位都好似，所以我哋兩個喺廠成日一齊食零食，有陣時我知道佢開緊工，都會買宵夜返去。」

她指在劇中與阿Moon有很多場口，大家的情感不需要刻意營造，「因為見到佢我就已經覺得好有親切感，所以阿Moon話我唔似第一次拍劇，係因為我覺得佢畀咗一種力量我，令我更加投入個角色。就算套劇完咗之後我哋都會約出去食飯，其實每次見到佢都覺得好溫暖好窩心。」