陳煒獨家專訪｜陳煒入TVB不介意配角做起 自認戀愛腦眼中只有另一半：我從來都唔係事業型

選美出身的陳煒，由一張「白紙」去到片場，回想新人的階段，她接受tvb.com獨家專訪坦言幸好面皮厚不停請教別人，亦不介意被罵，「當時要企喺咩位置，點樣可以唔遮人哋嘅光咩都唔識，真係好靠導演、幕後同事甚至前輩指導點做，我好開心咁多人教我嘢，即使畀人罵都唔緊要。」

年青心口掛着「勇」字，不斷向前衝，絕不怕辛苦。她憶述入行第二套作品便一嘗吊威也的滋味，更被吊足4小時，「當時喺紹興一個湖上面，有隻船駛出去吊我出船頭，模仿人哋水上飄嘅感覺，我吊咗4個鐘，就係拍一個喺水上飄好型嘅鏡頭。」

身為新人的她感到新鮮又好玩，惟她及後發現根本沒有這一場戲，最後只剪了幾秒放在片頭，但她只能默默接受。回想當年經歷，陳煒笑言「我唔知係被人玩定點」，「其實係幾辛苦，因為當你啲裙擺掂到水會愈嚟愈重，咁樣踏步係幾辛苦同好考體能嘅事，但嗰時年青咩都冇問題，同埋拍出嚟係靚嘅。」

在她演戲路上的初期，鄭則仕可謂首位令其認識甚麼是演戲的人，但作為新人的她要面對重量級前輩加上要擔當重戲份的角色，絕對是一大挑戰。

「因為本身都未識得入戲，突然間畀我咁重嘅角色，仲要演Kent哥細妹，生活起居嘅戲份要演得好自然，令人覺得好融入個家庭。但當時我好緊張，講對白都未講得清楚，加上嗰時Kent哥要我哋每場戲，將劇本放埋一邊，總之佢現場講啲咩就寫低佢，突然間要我硬背一啲嘢係好困難嘅事。」

即使感到無比的壓力，自知演技幼嫩的陳煒用心做好本份，盡力演好角色，這份的努力亦被鄭則仕看見，「佢最唔鍾意啲人冇放個心落去，佢見到我係有用心做有進步，即使做到嘅程度得3、4成都唔緊要，最緊要有心做呢件事。」

遇到嚴厲的鄭則仕令其認識何謂演戲，其後與劉松仁合作驅使她要努力學戲求進，皆因她深知演得好失禮。

「嗰時同松哥做戲，我記得第一場同佢喺房兩個人嘅對白，我真係驚同怯，完全講唔到嘢，講到一句講唔到第二句，不停NG。但松哥好好仲講笑安慰我，佢問我呢排係咪冇得瞓，所以太熱氣條脷變大咗，啲對白就會難講啲，仲叫我慢慢嚟放鬆啲。」

自覺表現不合格，當刻的陳煒也感到失禮，反思自己的不足，「我唔會因為現場做唔到而喊，但我會嗰晚返到屋企『囉囉攣』，點解我會做成咁，覺得好失禮，警惕自己下次再做好啲。」

人要不斷努力，才能成就自己，經過一次再一次的磨練，從挫敗中成長，直至接到演梅艷芳原型一角，令她對演戲慢慢有信心，「我覺得喺造型上幫助咗我好多，開始掌握到個角色，亦令觀眾覺得我做得入型入格。」

不過同時因為太入戲的關係，她沉醉在角色中走不出來，以致情緒一度出問題，「我當時一個人住喺酒店，成日匿埋喺房困住自己，嗰時仲用緊傳呼機收通告，除咗通告以外所有嘢都唔做唔理，甚至食嘢都唔想出街食，只係喺便利店買一堆乾糧當飯食。」

陳煒直言首次感受入戲的感覺，當刻感到孤獨無助，惟她回想那時某程度上是自己不願走出這個疑幻似真的世界，「前面拍咗咁大段戲咁辛苦，大家都好鍾意同滿意，同埋嗰時劇組請咗個攝影師影咗好多劇照，好多相都好靚，更加唔想出嚟。」

演技漸趨成熟，實力慢慢備受認同，但在2008年她結婚後宣布息影，甘願為前夫犧牲自己的事業，足見工作搏到盡，愛情同樣愛得轟轟烈烈。回望當時放棄自己的事業，跟前夫移居台灣，她坦言感後悔，全因找不到自己的人生價值。

「嗰時覺得嫁咗去梗係要陪伴另一半身邊，其實我唔覺得自己有任何唔適應，但慢慢覺得自己變得頹廢，冇乜人生價值，喺呢個社會冇乜貢獻，做咩都冇人關心，令我覺得要搵番自己。」她憶述。

愛情至上的陳煒直認至今依然是「戀愛腦」，「我從來都唔覺得自己係事業型女性，依家我對住老公嘅時候眼中都只有老公。」

2012年她與前夫離婚，在人生低谷的時期加入TVB再現幕前，惟昔日早已為女主角的她由配角做起，陳煒坦言從沒有落差感，反而感激公司在低潮時扶其一把，成為她的一點光，照亮其人生。

「因為我都有幾年冇拍戲，有人肯扶番起我，已經係非常大嘅恩賜，同埋嗰時自己嘅信心都唔大，你一嚟畀個主角我可能仲驚，所以慢慢咁樣試下一套，觀眾接受，再一套觀眾又受落，監製亦繼續肯畀機會，我覺得都好順利。」

相隔數年沒有拍戲，她坦言曾有擔憂不知觀眾怎看自己，直認怕「亞視味」重，又深知自己的缺點。「我喺講對白方面係需要落多啲功夫，所以我一路都改進緊，好多謝觀眾同監製一路畀機會。」

陳煒多年來讓人感覺不爭不取，一直隨遇而安，她自言性格被動，從不懂得爭取，更笑言「加人工都冇爭取過」，際遇相當順利，「無論係前友台定係依家公司，都不斷有好多唔同嘅嘗試同機會，不過當然主動去搵一啲機會，人生都可能會唔一樣，但我覺得好似依家咁樣都幾舒服。」

除了淡泊名利外，她出名情商高甚少看到其發火一面，不過原來陳煒曾在片場大發雷霆發火鬧人，至今仍令其印象深刻。

「拍《宮心計2深宮計》嘅時候，當時喺古裝街整咗個水池，講我哋啲妃嬪宮女都會浸喺個水池度傾偈。嗰時冬天好凍，我記得我嗰場又落咗陣雨更加凍。因為之前要拍啲宮女喺嗰度玩，但因為我嗰個係一個公主嘅池，啲陳設要轉，加上啲池水凍咗，要擺啲發熱棒助熱啲水，所以都等咗啲時間。」她憶述。

等了近兩小時後，終於拍她的下水戲，豈料幕後工作人員還在弄後面的陳設，令其一等再等，「其實嗰場我只係簡單講幾句對白做下反應，但我浸喺水度都有20分鐘，已經浸到震晒，我嘅耐性真係去到極限，令我好嬲忍唔住發火罵人。」

現時陳煒重提此經歷時感抱歉，提醒自己時刻應保持冷靜。「嗰一刻覺得自己嘅EQ點解咁差，事後我都有同對方道歉。」

今次在《正義女神》中，她演資深大律師高淑樺有大量的台詞需要熟讀，更要反複練習才能講得順暢和有說服力，感覺出來先會有氣勢，因此她指必需熟讀劇本才能發揮更好，絕不容易。

然而陳煒指花很多時間在處理對白上，並自揭有讀寫障礙，因此較其他人花更多時間看劇本。「讀書嘅時候已經發現有呢個問題，考試答問題，我做極都做唔晒，夠晒鐘我仲喺度逐隻字睇緊，所以依家入咗行都係咁，一定要聚精會神慢慢睇，睇完之後過濾再理解，所以我係好慢。」

而且，今次乃是她與佘詩曼首次合作，二人對戲火花四濺，獲觀眾拍案叫絕。陳煒直言很喜歡二人在最後庭上唇槍舌劍的場口，並指這種互鬥較宮廷戲更激烈，令人抖不過氣，「我覺得最尾係成套戲嘅最高潮，因為案件關乎自己個仔，所以喺庭上面嗰種對戰嘅狀態係好緊張激烈，非常好睇。」

星霜荏苒，入行轉眼過了三十載，走到今天，陳煒感到十分滿足，未覺有遺憾任何缺失的地方，只望一直拍下去，當一世的演員。

「除咗演戲我咩都唔識做，同埋我個人本身好平靜，冇咩特別嘢可以激怒到我，所以我好依靠角色上面畀到我嘅情緒，同埋可以透過角色感受唔同嘅人生，我覺得係精彩好玩。」

因此即使日後要演婆婆、嫲嫲的角色，她絕無顧慮，並指最大的關口已經過去，「反而係我十年前開始擔心要做阿媽嘅角色，個仔又10幾歲，但其實自己唔介意，因為事實上我真係生得出佢哋，我覺得冇咩問題，只係初時會驚演繹上演得唔好。」