陳瀅獨家專訪｜陳瀅過往拍拖避忌太苦！揚言有戀情唔怕公開：我想喺香港拖住手行街

18、19歲入行做模特兒，她並不是一心想入娛樂圈，只是很純粹因要交宿舍的費用，故當做兼職賺錢。

「嗰時我讀緊城大，有日喺街度有個人派卡片問我有冇興趣做model， 因為當時自己畀緊宿舍嘅錢，咁就覺得自己賺啲錢都係好事。因為卡片嗰間係細公司，所以我就搵當時邊幾間model公司比較可信，之後我就apply咗3間 ，其中一間就係我第一間公司種星堂，好快就打嚟叫我casting，之後就簽咗我。 」

一個決定，從此踏上銀星旅途，她回想當時「唔識驚」，沒有絲毫考慮便踏入這個圈，「嗰時諗住咩都試下，當然有聽過話娛樂圈好黑暗或者你會唔會畀人呃，同埋我屋企人又唔喺香港，所以依家睇番10幾年前嘅我真係好大膽，我好感恩冇畀人呃亦都冇唔愉快事件發生。」

做模特兒的期間，她對其中拍攝一個隱形眼鏡廣告印象深刻，至今仍歷歷在目，乃是她首次接觸「演」，「當時有個女人不停叫我重複戴眼鏡個動作，同講一句 『嘩！完住唔覺戴咗con』，咁簡單嘅一句，我拍咗超過一百個take。嗰刻我完全唔知發生咩事，個女人就話『你冇感覺，我feel唔到你戴呢個con真係舒服』。」

陳瀅坦言當刻還未明白那女士所說的意思，直至收工後，該女士特意走過來對她說的一番話，令她反思自己的不足。

「佢話阿女，如果你有心做呢行，你唔可以係咁，我感受唔到你想表達啲咩， 所以你要學下，我好多謝佢， 因為原來唔係就咁講完就等於演，當中包含咗好多嘢喺入面。」

其後她有機會拍攝《寒戰》發現自己的問題，「我好記得當時我係講到對白，但我全程係閉氣，直至到嗌cut先放鬆到，我係連呼吸都驚，成個人好緊張。」
她拍畢後發現不能以此狀態長此下去，故決定去學戲，並到北京電影學院學習兩個月的一個暑假進修班，此行令其獲益良多，明白何謂「演戲」。

2014年陳瀅接拍首部的電視劇《女人俱樂部》，正式展開其電視生涯，隨後很幸運地一部接一部，當中令她對演戲開竅的是《全職沒女》，深切體會到「入戲」的感覺，以及角色複雜的情感。

「第一次拍《M club》係同6個女仔同姐姐，嗰時個心態係玩，每日收工就同佢哋去食飯，大家都好開心，之後《四個女仔三個BAR》都係一班女仔，跟住《潮流教主》亦都係成班女仔，所以我從來冇感受過情感嘅戲 。直到《全職沒女》， 監製Andy搵我同振朗一齊有段豐富啲嘅愛情線，令我發現同女仔拍戲個感覺好唔同。 」

全因《全職沒女》令陳瀅對演戲有更深不同的感受，「原來一段戲有好多唔同可能性，原來演戲係咁。」

現時的陳瀅早已為女主角的級數，惟她自言絕不介意自己是否主角甚至戲份多少，只在乎演好每個角色，「監製搵我拍任何嘢我從來冇試過推，我好記得當年Andy搵我拍《平安谷》呢個角色，依家諗番都覺得好辛苦係折磨。」

她憶述這角色時仍難以忘記當中的辛酸，點滴回憶湧在心頭，「個角色講我老公死咗要陪葬，被人推咗落啲山洞，身上好多泥，當時落雨、又要喊、被人追兼跌倒，仲要有火燒又被人埋喺好恐怖嘅山上，真係好辛苦同埋係好少戲。我覺得係人生拍過最辛苦嘅一場戲，但我嗰時收到Andy電話，都係一口答應佢做。」

外界眼中她事業上可謂順風順水，每個角色總有得發揮，機會接踵而來，然而她同樣歷過低潮，陷入懷疑自己的漩渦。

「嗰時由一年兩至3部戲，慢慢到剩番一套都冇，就發現呢樣嘢唔係long lasting，我從來未試過要擔心嘅感覺。當唔使成日開工嘅時候就會諗究竟出現咗咩問題，點解會唔搵我？明明之前呢個監製好鍾意我會成日用我，開始質疑自己係咪唔夠好？唔夠勤力？或者自己做錯啲咩令你唔再用我等等。」

在懷疑自己的時間，她坦言當刻選擇逃避，故返溫哥華陪伴家人分散自己的注意力。即使面對工作上的難關，陳瀅對家人從來報喜不報憂，尤其不想與其感情要好的婆婆擔心，皆因其知道對方一直擔心記掛獨自在香港生活的她。

「當時我仲供緊加拿大嘅樓，婆婆成日都擔心我收入，驚我冇錢，每次我返去香港佢都會畀封利是我，希望我平安，咁多年我都儲喺度冇開到。我就會氹佢同佢講『你個孫女不知幾有錢』，當然佢唔知 ，即使依家佢離開咗都唔知，仍然覺得我好勁。」她憶述。

人要不斷努力成長，才能成就自己。現時的陳瀅不再像以前容易質疑自己，慢慢練成一個良好的心態面對所有的難關。「因為質疑自己只會令自己更加唔開心，亦幫唔到任何事又唔會令自己進步， 同埋人愈大愈明白你個心態係點先係最重要。」

入行初期她每次拍劇也與男拍檔傳緋聞，而其身形同樣備受外界關注，認為她身材不夠標準。面對種種的報道標籤，陳瀅坦言曾覺氣餒洩氣，背後努力工作的付出不被看見，惟她自覺年少貪玩，做得不足，「我唔可以責怪人哋咁話我，因為我唔係最自律對自己嘅身材管理，我對每部劇嘅男拍檔亦冇保持距離，我鍾意同人傾偈，鍾意同人做朋友留個電話。」

她回望過去，應該要在適當的時候做適當的事，做好自己本分，「依家睇番既然我咁唔鍾意啲人咁寫，我咪食少啲嘢做多啲gym，同男拍檔開工放飯唔一定要一齊食，可以自己食，避免呢啲新聞。依家我工作亦比以前專注同集中，空檔時會準備下一場戲，而唔係好似以前咁掛住傾偈。」

在《臥底嬌娃》中她演的江妙姿是重情重義的人，非常重視好友蘇嘉盈，現實中的陳瀅也是同類人，不會輕易放棄任何關係，「即使係對方唔啱，我都會維護同畀機會佢。」

她自認容易交心的人，在圈中的一班好姊妹，包括王敏奕、糖妹和賴慰玲等，大家能相知相交，友誼難能可貴。不過要放心信任圈內人，一點也不容易，陳瀅直言眾人的友情經過時間上的證明，「成長過程一定會發現有啲人唔係咁夾，慢慢發現同咩人一齊個能量會低，咩人係愈傾愈興奮，呢啲係自己嘅感覺。」

雖然戲裏她是內向型暗戀馬貫東，惟現實中她自言是進取型，對喜歡的男生會主動爭取，絕不會「等運到」。

身為女神的她多年來也與不同的男士傳出緋聞，一直「只聞樓梯響」，陳瀅大方透露曾有朋友介紹圈外人認識，惟未有合適對象，即使現時單身，依然保持寧缺勿濫。

「如果呢個啱嘅人係啱嘅時候畀我認識，大家又夾我會想拍拖，但我依家唔覺得寂寞，唔係好急需要一個伴侶陪住我，因為我覺得依家自己嘅人生各方面都好滿足好感恩，唔覺得生命缺乏愛。」

每段情總有甜與苦，陳瀅渴望將來能在公眾地方享受拍拖的甜蜜，更揚言表示「好想喺香港談戀愛」，「我好想佢帶我出去食飯、好想拖住手行街、好想食飯過程都有互動，因為以前我係會照出去食飯，但唔會有咩肢體接觸，食完飯就前後腳走。但依家我會好想喺香港談戀愛，我未試過喺香港公眾地方拍拖，呢個係我冇嘅一個經歷。」