:quality(80)/public/tvbcom/article/images/202603/8adb5aaf-901b-421b-a38f-bd5da014dccc.jpg)
《臥底嬌娃》昨晚其中一個焦點場口，是私煙強（彭迪安Eddie飾）被神秘人克洛索帕（吳子冲飾）嚴刑逼供，被對方逐隻手指以鐵鉗鉗到流晒血，配以Eddie痛到入肉的表情、以及大汗淋漓的狀態，相當慘情。其實Eddie在《嬌娃》中雖然做番老本行「古惑仔」，但依然有種新鮮感，皆因他出親場不是被馬貫東喪打、就是跑到喘氣、或陷於死亡或極痛邊緣。
親認半天吊場口難頂離心力：有少少驚
昨晚一集Eddie除了「手指最痛」，還被馬貫東推了半個人出天台，睇見都牙煙。談及「天台半天吊」場口，Eddie透露是台前幕後合作成果：「天台嗰場，最辛苦唔係我，可能我已經習慣咗做親衰人都有唔好嘅下場。嗰場最辛苦係個天氣，因為我著晒西裝架嘛，但嗰日係烈日當空，大概正午11、12點，真係曬到爭啲中暑。」、「到阿東推我出去嗰度，都係習慣嚟架啫，其實唔辛苦，但因為凌空吊咗出去後，試過幾次好似都唔夠驚險，所以就再吊出啲，咁就要靠有其他工作人員幫手拉住我，同埋連個攝影師都要幫手托住我等我唔好跌落去，所以係所有手足都好辛苦，嗰場嘅離心力係有少少驚嘅。」
Eddie的「男人最痛」演出，令網民相當impressive，紛紛留言嘆息兼表示同情：「Eddie演古惑仔真係一流」、「Eddie好慘」、「Eddie做親古惑仔都要咁渣」、「Eddie真係慘，成日做弱勢古惑仔」、「點解阿強成日畀人打」。
其實Eddie曾在訪問中提及，對於演過無數次古惑仔，雖曾一度感到迷惘，但仍深信「行行出狀元」。其實Eddie的古惑仔角色確是相當多元，就連下場都「精彩」過人，基本上有「死於非命」、「被怒打」、「坐監」、「被出賣」及「一無所有」等基本五大悲慘下場。談到「死於非命」，最經典的莫過於在《隱形戰隊》中慘變「人肉炸彈」的火屎，被活活當場炸至粉身碎骨的場面至今令人印象難忘。
Eddie有潛力成「痛苦樣專業戶」
除了死得轟烈，Eddie被「虐待」的方法亦層出不窮，在《刑偵12》中，Eddie飾演的「鄧安」在其中一場被綁架戲份，需要整個人浸在水中演出，拍攝時浸足大半日之餘還要學「宇宙大王」用鼻飲水。另在《俠醫》中，Eddie角色傅志雄在前期劇情幾乎出親場都被打到傷痕纍纍、口腫面腫，次次都要陳豪為他善後。而回顧Eddie的「男人最痛」場口，發現Eddie每次演繹極痛表情都相當有穿透力，絕對有潛力成為「痛苦樣專業戶」。
「最緊要觀眾睇咗有代入感」
談到往績，Eddie透露近十年最難忘場口首推《刑偵12》的水浸場口：「我浸咗大半日，病咗幾日。」「其實做邊行都辛苦，但做演員嚟講，只要觀眾睇咗有代入感，覺得好驚好恐怖，就幾辛苦都係值得。」
