胡敏芝獨家專訪｜胡敏芝入行5年未能畀家用堅持演戲 遭網民批演技親自回應：我排咗呢條隊，唔會輕易就走

個性外向、從小有表演欲，在中學時已參加話劇和音樂劇的胡敏芝，喜愛戲劇的種子，早在童年已經種下。她最初想修讀演藝學院，惟全因當時受到家人和社會的觀念影響，認為大學學位是投身職場有穩定工作的「入場券」，因此最終她考入中文大學的新聞及傳理系。

畢業後她不像其他同學找穩定的工作，偏偏決定考訓練班，全因其心底裏最愛的還是做主持和演戲，「訓練班只係讀半年，所以想試下。」

胡敏芝報名參加訓練班更是「先斬後奏」，成功入到才告訴家人，「嗰時要面試3次，我係成功咗先同屋企人講。因為我都幾唔受控，不嬲都係想做咩就做咩，佢哋知道就算罵我同我講都未必會聽，所以最終只可以無奈接受。」

雖然做演員收入不穩，惟她從沒擔心，只因決定了的事便不會想太多。「我係比較All in 嘅人，向前衝唔會諗咁多，同埋若果我真係想賺大錢，最初我就唔會揀傳理系呢一科」。

入行五年，她坦言現時還未有能力給家用，即使獲家人體諒，難免也曾被他們勸退找穩定收入的工作，惟其對演戲的熱愛和決心，並不輕易動搖。

「我係好固執嘅人，即係好似嗰啲排隊嘅人，我排咗呢條隊，唔會輕易就走，點都一定要排到個位。」

在這個演藝夢上爺爺的支持成其努力的動力，不論她做得好與否，永遠也是有讚無彈，更不時幫口維護她，「有時嫲嫲會話：『你真係搵份工啦，唔好咁唔穩定。』佢驚我辛苦，跟住爺爺就會幫口話：『你由得佢啦，開心咪得囉！』」但胡敏芝深知兩位也十分疼錫她，只是愛護的方式不一樣。

有遺憾才是人生，在她首次擔重戲份的劇集《麻雀樂團》，愛錫支持其的爺爺不幸離世未能見證，胡敏芝直認雖有遺憾，惟她知道家人最想她開心，「我覺得天上嘅爺爺睇到應該開心，由細到大屋企人對我嘅要求都好簡單，只要我開心做番自己，佢哋已經覺得perfect」。

天生樂觀，想法簡單，走到五光十色的娛樂圈，她依然保持真我，一切隨遇而安。不過這個「佛系」性格，她坦言較蝕底，因此也想過作出改變。「有時候我見到有啲同事好主動，我都覺得咁樣都係好事，因為喺呢行的確係需要，所以都希望自己可以改變下，學識主動啲。」

入行不久後，她幸運地很快有機會擔任節目主持，包括《搵鬼去電視城》、《不正常愛情研究所》、《荷蘭Pop Guide》和《野外步出3》等，不過始終做主持沒較演戲快入屋，惟胡敏芝視每次也是學習的機會，從中成長，從沒想太多。

「訓練班出嚟嗰陣乜都唔識，所以公司有咩派畀我就去做，嗰時知道自己有得主持第一個節目，已經非常開心，所以真係冇諗咁多邊樣較入屋嘅問題。」

除了獲得不少機會外，她感激一路上提點幫助其的人，提醒自己要不斷進步，「你永遠都可以做得更加好」，其中在早前播出的《非份之罪》，胡敏芝直認最有挫敗感，全因演戲經驗尚淺，未能好好拿捏情緒戲。

「呢套係我喺drama裏面嘅第二套，第一套係《企業強人》，當中角色嘅情緒起伏冇咁大；但《非份》真係超級多好重嘅感情戲，同埋有好多好極端嘅情緒要展現出嚟，對我嚟講係好難。」

她回望自己的表現，實在很多不足的地方，「我覺得當時捉唔晒所有情緒，自己不論係演戲經驗或者人生閱歷都唔夠，就算有準備，但都係唔夠好演唔到出嚟。」

對自己的演出有要求，最重要的是她不想因其表現浪費大家的心血，「我想個角色更加多元化畀大家睇到，所以自己都會有一定嘅期望，做得唔好係會唔開心。」

而且，她亦有留意網上的評論，看見有網民留言彈其演技差，雖然有不快，惟胡敏芝並無選擇逃避，反而以正面心態面對負評，更親自回覆該網民承諾必定會繼續虛心學習。

付出並非與結果成正比，她深明演戲並非能一步登天，需要時間磨練，有吸收才會有進步。

人總有迷失時期，胡敏芝也不例外，經歷無工開的日子，會不斷懷疑自己，陷入情緒低落的漩渦，哭泣甚至失眠。「最初不斷望住個天花板等個電話響，睇下幾時有工作搵我。」

不過她直認天生性格樂觀，並不會過度自我沉淪，沉澱數天便會重現「阿樂」的性格，提醒自己「人生嘅路就係充滿迷惘，無了期咁樣等落去都唔係辦法」。

胡敏芝趁沒工開的日子，學懂不斷增值自己，不要原地踏步，「自己搵啲嘢學，或者去旅行擴闊眼界，探索多啲唔同嘅嘢，唔好畀個人停落嚟。」

在感情方面，早前她在《非份》演「戀愛腦」狂迷Wendy，對吳偉豪癡情到極致，引起不少關注。現實中她自言是理性的人，做事有底線。

「我知道有啲咩係可以做，有啲咩係唔可以做，唔會盲目支持另一半。」

雖然很多人認為娛樂圈是大染缸，認識新朋友時難免會有所避忌，惟她自言沒想得那麼複雜，「我哋呢行每次拍攝都好似一個新嘅project，都會遇到啲新嘅人識到好多新嘅朋友。我亦唔抗拒認識新朋友，我覺得人與人嘅關係係好簡單，冇必要因為大家嘅職業而有咩特別顧慮。」