由王偉仁監製、林麗媚擔任編審的《神耆小子》,由5月6日起逢周一至五晚九點半翡翠台播映。《神耆小子》由兩屆金像影帝得主鄭則士(Kent哥)夥拍劇集界新丁冼靖峰(Archie)攜手演出,雖然二人演齡差距頗大,但演出卻一拍即合,在連場與Kent哥的互拋場口,Archie不但「戲勢」頂得住,就連涉及勁多IT專有名詞的對白亦應付自如,值得期待。Archie受訪時笑言全靠Kent哥貼身指點,並細數Kent 哥3大暖心行徑,首先是教講對白加揣摩角色,然後是近乎24小時貼身指導及慰問,第三點則是樂於與後輩分享人生經驗:「由Day 1去到最尾嗰日,Kent哥都係教緊我嘢,佢知我演戲經驗好少,佢唔單止教我講對白,仲教我點分析角色同揣摩角色對於故仔嘅功能。同Kent哥拍完每場戲,喺休息時間佢都會講解番場戲點解要咁做;每日拍完一齊食飯,佢又會講番我聽佢嘅相關經驗、同我點樣可以去更好咁裝備自己。」
延伸閱讀:神耆小子劇情|全20集劇透懶人包(持續更新中)爆笑尋找家庭愛 鄭則士/蕭正楠/樊亦敏/曹永廉/冼靖峰
![](https://www.tvb.com/thumbor/cXEF5hHMBffe0HAjlDMFJ9Fhczs=/0x0/public/tvbcom/article/images/202404/b51df0d2-6969-413a-ba8a-fd2d5e56b840.jpg)
![](https://www.tvb.com/thumbor/2nJ6AZjVzkkFa47HIsUKaI0TEOA=/0x0/public/tvbcom/article/images/202404/e2e160dd-d725-48f7-8102-730b8f6c6d17.jpg)
![](https://www.tvb.com/thumbor/MhytTyDTc2qRYzJ8ASvU1cfdFiw=/0x0/public/tvbcom/article/images/202404/705aebf0-5d21-4285-8df6-32146602332b.jpg)
狂刨IT資訊投入角色
「佢連Off cam之後返到屋企,都會再Text我,教我邊場邊場可以注意啲乜,臨尾仲一定加句:『希望你拍攝順利啦』。Kent哥又會同我傾偈時教我好多人生道理,用佢嘅人生經驗教我點去看待自己嘅事業。拍完套劇我就去咗拍《亞洲超星團》,Kent哥差唔多每兩、三日就同我講加油,問我咩狀況、有冇咩困難?呢啲前輩邊度搵?」與鄭則士份外投緣的Archie,坦言對方與自己已過身的爺爺很相像:「都係佻皮得嚟又有威嚴,所以對住Kent哥,我係愈嚟愈唔怕佢,一開始都驚佢架。」Archie另外還感激樊亦敏(Amy)的提點:「我平時會睇多啲IT嘅嘢,呢個係Amy姐教我嘅,到我睇劇本時我就知個term講緊咩,就可以好有自信咁講到出嚟,咁角色嘅說服性會強好多。」
![](https://www.tvb.com/thumbor/vgA7_rw467Ja8uE8aLvDdMCZZM8=/0x0/public/tvbcom/article/images/202404/fd24f1ef-cb33-4e9b-99b7-c5a34bf4a977.jpg)
![](https://www.tvb.com/thumbor/1daKvB14o2BRVTiC8TAy2w_USew=/0x0/public/tvbcom/article/images/202404/3458ce4a-40df-42bd-93a4-b6eab018068b.jpg)
![](https://www.tvb.com/thumbor/SvzK7_SsoakkNTA1r5_GqscTHUM=/0x0/public/tvbcom/article/images/202404/593f5f7a-d05c-4a70-97eb-ff04957a149d.jpg)