死有對証｜陳曉華首演法醫無懼血淋淋內臟 韋家雄難忘豬肝味道 拍外景熱到兩度中暑

首次演法醫的陳曉華，劇中有不少解剖場口，對於修讀護理系出身，對其而言相當熟悉。她接受tvb.com獨家訪問指讀書時對解剖學感興趣，即使要解剖內臟也沒問題，「我完全接受到，因為以前讀書嘅時候 ，我哋係睇解剖學人體嘅骨，所以我唔覺得核突嘔心，就算血淋淋都冇嘢，因為呢啲都係醫護系嘅範疇。」

她續說：「我記得喺解剖室嗰10日入面，我係好投入同專心 ，成個拍攝過程好開心。」

不過曉華直言最難忘拍攝一場外景戲不幸發燒，「有次出外景期間突然發高燒，嗰日都好攰，但我拍緊嘅時候好投入喺個角色入面，所以拍嘅時候冇咩嘢，我睇番啲片都覺得狀態唔錯呃到人，同埋嗰日好感激大家照顧我。」

她指每次拍外景大家也十分辛苦，但一班人非常熱血想做好件事，「 因為啲道具要擺到好齊，又要喺唔同位置執番返嚟，但就係大家嘅熱血同投入先令到件事唔係咁辛苦。」

至於同樣首演法醫的韋家雄，受訪指今次較多資訊性的對白相對有難度，「因為有好多專有名詞，我都係死背盡量記，好彩都冇乜NG。」

談到他要解剖不少內臟，如豬肝和豬肺等，家雄坦言豬肝的味道最難頂，「我已經戴咗膠手套，但一摸都已經好臭，所以我拍嘅時候盡量要閉氣，簡直係愈拍愈臭，比垃圾站更臭。」他笑言拍畢這些解剖戲後，「 廠有支火酒都畀我用晒」。

提到最難忘辛苦一場，家雄指其中一場要穿整套防護衣上陣挖屍，熱到中了兩次暑，「因為嗰場戲講發現有山埃，所以我哋要着晒防護衣、 戴眼罩同口罩，由頭包到落尾，加上天氣好熱，我都中咗兩次暑，之後都要休息一陣再拍。成個感覺好似拍緊潛水戲，吸完一大啖氣就要即刻講晒啲對白，所以嗰場令我好深刻。」