死有對証｜王菲首獻螢幕初吻讚對手黃俊豪有風度親爆拍咀戲向另一半備案：佢好支持我

點讚

撰文：柔娛絲

發佈日期：2026-09-28 13:30

《死有對証》，今晚（28日）一集美寧（王菲飾）向「高富帥」Michael（黃俊豪Jeremy飾）獻出螢幕初吻，令正印男友高俊（馬貫東飾）「戴綠帽」。 

講到美寧想與帥氣富有的龐米高Michael合夥投資瑜伽中心，惟高俊認為Michael有不良企圖，與美寧不歡而散。

高俊踩上 Michael 公司暗中調查，Michael 竟用激將法狂寸高俊：「你知唔知你衰乜嘢？你衰無錢！」幸好高俊忍住冇中計，僅警告對方不要對美寧有非分企圖。豈料心機極重的 Michael 竟然自製傷勢，向美寧「屈」高俊打人兼要撤資，令美寧對高俊徹底心死，提出分開冷靜。

美寧相約Michael飲酒大吐苦水，埋怨與高俊拍拖愈來愈攰，「依家連我識乜朋友都要管」Michael趁虛而入向美寧表白，更主動霸王硬上弓咀嘴，成功奪取芳心！

原來今次乃是王菲的螢幕初吻，她接受tvb.com獨家訪問坦言初時得知有咀戲十分緊張，怕自己做得不好，「當收到劇本知道對手係Jeremy都放心啲，因為我本身都識佢變咗會冇咁緊張，同埋呢場戲係喺後期先拍，我哋都有另外場口Warm up咗，已經進入咗個角色。」

她又讚Jeremy十分有風度，「我哋喺鏡頭背後有傾偈，同埋佢又會同我溝通點樣拍，令我拍嘅時候唔會有尷尬感覺，成個拍攝嘅過程好順利。」

談到她拍攝親熱戲有否與另一半「備案」，王菲笑言有主動申報，「佢初時以為對手係阿東，當時佢仲講笑話睇少一集。但其實佢好支持我，因為佢都做過幕前，好清楚知道演員接到咩角色都要專業去完成，所以佢好支持我挑戰唔同角色，依家每一集都有捧場。」

主頁