梳化時間｜阮浩棕入行曾日日捱鬧 用實力洗脫「星三代」光環 自認唔識追女仔：我係鋼鐵直男

他演藝的血脈像刻在骨子裏，是他人生重要印記。阮浩棕自小有表演欲，小學參加故事演講比賽，一度未被老師選中參與聖誕話劇而失落，至今仍歷歷在目。在小五時他首嘗演戲滋味，只覺得原來做戲很好玩，直到上到大學因參與音樂劇，真正對演戲產生濃厚的興趣。

「大學嘅時候參加咗個音樂劇，Professor唔單只揀咗我做裏面嘅男主角，連年度嘅音樂劇同樣畀埋我做男主角。喺排練嘅過程到演出，我發現我真係有興趣，好想喺呢個方向發展，所以大學畢業就入咗訓練班開始咗呢個旅程。」

嫲嫲是梁舜燕、爸爸阮惠源是著名的製作人，他沒有靠家族背景走捷徑入娛樂圈，反而考訓練班入TVB由低做起，全因父親的一席話。「你乜都唔識，就出去闖，你點樣行呢？死咗都唔知咩事啦。咁不如入TVB由零開始，從最底層開始慢慢學起。」

回想至此，阮浩棕慶幸有聽從爸爸的提點，全因他在TVB一步步學好基本功，才能成就今日的他，「嗰陣喺訓練班出嚟由跑龍套做起，由唔知做乜，到清楚了解鏡頭前面每一個崗位發生乜事、知道要點樣去面對鏡頭，呢都係基本功一步一步慢慢建立出嚟。」

不過他坦言考入訓練班時，原來家人曾致電公司，而且樂小姐的一句話令其耿耿於懷，質疑自己的能力。「嗰時面試樂小姐見完我所有嘢，就問咗我一句：『你係咪有屋企人喺度做？』我話：『係。』之後佢話：『哦，咁得啦。』其實嗰句我係好唔開心，去到訓練班開學我都係耿耿於懷。當時我哋每個星期都要寫週記畀我哋嘅導師旦哥（鄭丹瑞），我第一篇嘅週記就同旦哥講咗呢件事 ，但旦哥同我講：「我係揀咗你，先知道原來你有呢個背景，叫我唔好去介懷。」

背着「上等孫」、「星三代」的稱號，自認年少氣盛，不想讓人覺得靠家人才能在這行生存，他更怕的是自己做得不好影響到嫲嫲，嫲嫲的名聲重於一切。但人成長經歷摯親的離世，心態改變學懂釋懷，明白這些的標籤也是阮浩棕的一部分。

「嫲嫲走咗，個人真係成長咗，慢慢覺得呢啲稱號都係令到大家認識我嘅一個原因，但自己需要做得好先得，你會好懷念佢嘅每一樣嘢，唔需要再介懷呢個身份。」

自幼與嫲嫲感情要好，每當被哥哥還是表姐欺負的時候，他第一時間找嫲嫲保護，對阮浩棕而言她是其最強的避風港、最忠實的支持者。即使不是同住，但每星期兩人也會見面吃飯，也經常通電話，關係親密。回想昔日兩嫲孫的溫馨時光，阮浩棕沒有特別細訴那刻最難忘，全因每段美好的回憶也是獨特和珍貴。

他憶述，「其中一段最特別係同佢一齊拍《EU超時任務》，機緣巧合下我做番嫲嫲個孫，我仲好記得去到圍村入面，嫲嫲見到當地居民會同佢哋講：『呢個係我孫仔嚟㗎！我親孫啊，好叻仔㗎！記得支持佢！』」

回想嫲嫲對自己的愛錫，阮浩棕不禁哽咽，「嫲嫲會咁樣做，所以係好難忘，亦都係唯一一次同嫲嫲一齊合作，好珍惜呢個機會。」

入行後，嫲嫲經常讚賞他，但他覺得自己不值，從沒接受這份讚賞，即使在嫲嫲臨終前，依然記掛這位孫兒，給他信心望其繼續勇敢前行這條演藝路，「佢同我講：『你好叻仔、好乖仔 、你得㗎，唔使擔心。』」但嗰刻我都冇接受佢嘅讚美。」

直至2024年，他終於勇奪「飛躍進步男藝員」乃是人生首個獎項，為其事業打下「強心針」，可惜嫲嫲未能親眼見證，是他一生的遺憾。

「人生就係美中不足，我冇辦法畀佢親眼睇到我嘅成績，但我相信佢喺另一個世界睇到。」不過嫲嫲敬業樂業和以禮待人的態度，他銘記於心，一生學習的榜樣。

不斷磨練蛻變，從挫敗中學習，在入行初期，一張「白紙」的他，曾每天開工被導演大罵，令其明白演戲是需要時間累積經驗。

「嗰時拍《為食神探》，我做兩位女主角嘅flashback男朋友，第一年入行對住兩位女神級、一線嘅演員，我完全唔識點做，同埋感情戲某程度上係要男人去帶動，我放唔開，所以每日開工就畀導演罵，罵到當時返工嘅心態係『唉，又要返去畀人鬧喇！』」

當刻的阮浩棕無能為力，只能盡力而為，靠自己摸索，「呢個角色係超越咗我當刻嘅能力，但呢啲都係經驗，需要慢慢累積。」

他曾在2017年離巢跟父親到內地發展，走出電視城，放眼世界，這段經歷令其大開眼界，「唔單只見識到內地嘅製作，仲見到好多好犀利嘅演員，特別要多謝君豪老師，佢教咗我好多嘢，亦都見到同我差唔多年紀嘅演員，佢哋做得好好，自己同佢哋相差太遠。當時先知道天外有天，自己有幾渺小。」

同時在這段日子，他經歷人生首個低潮期，一嘗零工作的滋味。「以前最初出嚟做嘢嗰幾年都一直工作，去到內地先知道可以零工作，拍完一套劇休息下，點知個休息係無了期，有成半年嘅時間。好彩之後上北京，有其他導演搵我畀個角色我做。」

原來這些的機會是父親暗中出手幫忙，但他從不會說出口，而在內地的經歷，阮浩棕不但在事業上成長，與父親的關係亦有所改變，兩父子由隔膜變得親密。

「細個某程度上係有啲驚佢，因為每年佢得一個月，最多可能有三個月喺香港，所以我哋好少溝通，同埋細個嘅時候，佢好容易發脾氣鬧人，唔識得點樣去表達對我哋嘅愛。我真係去到同佢一齊生活，了解咗佢好多，亦睇到佢工作好勁嘅一面，慢慢摸到大家嘅脾性，關係先至變得更好。」

歷過低潮，他坦言更清楚了解到自己對演戲懷抱熾熱的心，只想一生當演員，一直拍下去，「我知道我好需要去演戲，釋放自己裏面嘅能量出嚟，最近呢段時間未有得拍劇，原來我壓抑咗好多好辛苦嘅感覺。」

現時未有合適的角色時機出現，他深明在這行「運」是十分重要，坦言年少時曾有比較的心，介懷別人機會多多，惟人長大懂得放下轉念，明白到沒辦法怨天尤人，「你個運未到就係未到」，只能不斷提升自己，做足準備。

外界眼中，阮浩棕形象沉穩、踏實。他自言「學做戲，先學做人」，懂敬業才發揮真正專業，戲外實事求是，戲裏憑實力發光。「我唔係嗰種好Sociable 嘅人，喺戲外要成為大家嘅焦點，反而我想大家透過我嘅作品演出認識我，我只係想做好一個演員。」

外表帥氣、條伴不俗，在感情上他竟自認「垃圾」，「我唔識追女仔，真係好渣，垃圾呀！」

「我係鋼鐵直男嚟，我印象裡面聽過最多另一半講過嘅一句說話就係『其實你做過啲乜嘢，點解我會同咗你一齊嘅? 』」我完全唔識任何嗰啲花招，兩個字『真誠 』我無㗎喇！」他笑言。

現時單身的他，對感情事隨緣，「如果身邊有一個人陪住我，我會歡喜，但係如果無呢個人，咪過好自己。」

曾拍過數次拖的他，直認每次拍拖也以結婚為目標，惟最終並未開花結果。「由細到大，我每次拍拖都希望會走得長遠，每一位都係向嗰個方向行，我唔係嗰啲玩玩下嘅人，因為我覺得如果你唔係想行去人生下一步，點解你要拍拖？但奈何實際情況唔係我控制。」

今年將踏入36歲，雖到成家立室的年紀，惟他坦言仍未有自立能力而感到羞愧，「依家我都係同屋企人住，如果我要自立出嚟住嘅話，我嘅經濟能力上面係咪完全可以毫無負擔，又好似真係未係，其實都幾羞家36歲仲係咁，所以屋企人都唔會畀壓力我，因為佢哋知我實際情況。」

但他也有幻想過將來的家庭畫面，望找到對的人，共同拼湊人生的拼圖。