林溥來Patrick sir自爆為角色激減7kg 親揭享受演「變態佬」原因：覺得自己有啲變態

林溥來（Patrick sir）接受tvb.com訪問自爆為角色激減7kg，望感覺更似「變態佬」：「其實監製冇要求我減肥，我都冇同佢講減磅，但我覺得變態佬瘦啲感覺似啲，所以我就用咗個半月時間減咗15磅，但因為我好鍾意食嘢，嗰段時間忍口都忍得好辛苦，每次放飯只係食3分1 。」

談到今次角色，林溥來（Patrick sir）直認有挑戰：「呢個角色真係變態、好陰沉，平時就不露聲色 ，但一有少少嘢佢就會爆發出嚟，真係幾恐怖，最初我接嘅時候都覺得有難度，因為我個人性格大開大合， 又做開主持大大聲，所以呢個角色我就要收起去，動作會細啲，講嘢亦會壓低把聲 。嗰段時間代入咗角色， 我覺得自己嘅思維都有啲變態。」

提到角色有所難度，林溥來（Patrick sir）在今次處理角色上與平時也有所不同，「平時拍嘢我去到片場都會同人傾偈，但今次我去到現場自己會坐埋一邊， 唔同人傾偈，靜靜地令自己進入個角色，望人都唔係正面望而係背後望，練習下啲眼神，呢樣嘢都幾幫到自己演繹。」

另外，談到監製羅永賢（Marco）很喜歡找其演黑人憎或另類角色，今次又找他演「變態佬」，對此林溥來（Patrick sir）自言首次演變態角色， 更大呼「好鍾意」：「其實Marco搵我做呢啲角色，就係想我做啲同自己形象反差大，令觀眾睇到我唔同嘅一面。」

他續說：「 好多人覺得我哋做主持係唔識做戲 ，因為我哋有主持腔， 但監製好信任我，呢樣都係對我嘅肯定，雖然我場口唔多， 但我好享受演呢個角色，好感激佢畀好多唔同意見我，令我做得更好。」