愛回家之開心速遞第2721集｜辦公室同事沉船記 男女之間無純友誼？

【愛回家之開心速遞第2721集】最純純友誼？

今集《愛回家之開心速遞》2721集可以叫「IT狗媒人變被耍記」：Ivan(鄧永健)見Joe(何晉樂Rock)同Win(莊思明)走得太近，又要幫佢哋頂更做嘢頂到手斷，於是決定一邊做紅娘撮合佢哋，一邊諗住將其中一個調走，點知最後反被人耍。

Joe、Win 被懷疑「唔止朋友」

開頭就見Win成日忙到錯過尾班車，要喺Joe屋企留宿，仲霸住廁所一整晚，Joe又幫佢留牙刷、護膚品位，一副「半同居」狀態。

喺初戀冰室，Win幫Joe拔面上汗毛，兩個互相打打鬧鬧，完全當旁邊同事透明，Ivan望到成面黑人問號，忍唔住話：「男女之間邊有純友誼？」開始懷疑佢哋「有古怪」。

另一邊，IT部 Ivan同Laptop(孟希璘)日日幫全公司殺電腦病毒、維修網絡，仲要幫Joe同Win執手尾，一人做兩人嘅 workload，搞到「雙手快報廢」。

Ivan痛定思痛，決定自救：既然佢哋形影不離，不如乾脆撮合做情侶，然後用「拍拖影響工作」為理由，游說大龍生調走其中一個，IT部就可以請個識做嘢嘅新人返嚟。

近距離「造火花」：同房、同床

Ivan拉晒Joe、Win去郊外度假屋，聲稱要「閉關做AI系統」，實際上只拎兩部電腦比自己同Laptop用，叫Joe同Win「自己搵嘢做」。

佢仲偷偷拎走Win嘅睡衣，逼Win開口問Joe借衫瞓覺，企圖製造「著住你件Tee，聞住你味」嗰種戀愛感覺。

結果安排大錯特錯：Ivan拎錯咗Joe件睡衣走，Win反而要借衫俾Joe，浪漫度瞬間歸零。

晚黑仲出現「經典一床事件」：度假屋其他房門鎖晒，只剩一間有床，Win堅持「女士優先」，最後兩個各瞓一邊，而且講明係「純友誼」，收尾冷過冷氣。

媒人誤判：Ivan以為成功，其實畀人玩返轉頭

度假屋任務完結後，Ivan以為計劃失敗，點知慢慢留意到Joe見到Win嘅態度有變，

唔敢望對方、稍為有身體接觸就彈起走人、同Win講幾句就搵藉口避開。

Ivan突然「開竅」：男仔如果連望都唔敢望、講多兩句就逃走，其實唔係討厭，而係動心同緊張，直頭判斷：「Joe已經唔再當Win係普通朋友。」

好快，Joe主動搵Ivan咖啡，問公司有冇規定「同一部門拍拖要調職」，再支支吾吾承認：上次度假屋之後，自己對Win有feel，想追但唔識點開始，仲提議買戲飛約大家一齊睇，借機會慢慢發展。

Ivan聽到之後開心到爆，覺得自己媒人計劃正式「開花」，仲約埋Laptop陪睇戲，心諗可以中途借故走人，放低兩個朋友獨處。

不過，到戲院約定時間，Win同Joe都失蹤，電話又唔聽，Ivan只好同Laptop自己入場，暗暗幻想可能兩位主角「自行發展二人世界」。

反套路：原來被撮合嘅係……Ivan同Laptop？

真相其實早喺度假屋已經掉咗提示：Joe同Win喺房內表面冇火花，心底其實早就察覺到 Ivan 與 Laptop 想撮合佢哋，兩人於是夾手夾腳「反向操作」。

最終大招係「飲酒局」：Ivan本來約Joe「酒壯男兒膽」，打算灌醉佢，好讓佢向Win表白，點知Joe反而瘋狂幫Ivan斟酒，仲一邊講：「你辛苦，敬你一杯」、「代表接龍再敬你一杯」、「代表爸爸媽媽再敬你一杯」，成功將部門大佬灌到半醉。

最後，Ivan同Joe都醉咗，Win默默照顧醉咗嘅Joe，替佢抹頭髮、吹乾，製造出兩組「疑似曖昧」畫面。

第二日朝早，Ivan發現對Laptop多咗啲微妙尷尬，又唔知係咪真係「咩事都冇」。

Joe同Win喺旁邊偷笑，最後自己總結：「我哋真係唔過電，純友誼呀。」