愛回家之開心速遞第2717集｜直男係愛情PUA高手！

【愛回家之開心速遞第2717集】再見愛仁

今集《愛回家之開心速遞》2717集，其實就係一句：人人以為熊樹仁(單立文飾)係「直男PUA王」，David (湯盈盈飾)又開始懷疑自己俾人情緒控制，點知兜兜轉轉發現，原來呢個大叔口蠢心軟，表面直男其實內裏係暖男。

直男？渣男？定係被誤會？

一開始，大家見David食早餐兩啖就停，仲以為食到蟑螂，結果佢話只係冇胃口，可能尋日同熊樹仁去行山着涼。

Flashback一出，畫面超經典：David生理期、拎住重到癲嘅三腳架行山，話頂唔順想休息，熊樹仁一句「多飲兩啖水就得」，仲自己跑上山頂，當係軍訓咁樣訓練佢，搞到一班人覺得：「全世界得David先頂得順呢個男人。」

返到現實店，大家開始講起另一個「渣男教科書」同事Jason (劉展霆飾)同Gigi (羅雪妍飾)嘅故事：Gigi生日想要幾百蚊嘅手鍊，Jason先去求平安符，之後又話「想試探女仔底線」，睇吓可唔可以用平價禮物控制對方，完全係PUA發言，聽到成班女即刻火都嚟埋。

原來Jason成套「裝直男」追女仔計劃，全部係策略：用最低成本控制感情、唔比期望、再用情緒勒索，控制人哋唔好「得寸進尺」，大家聽完簡直一致判佢「渣男罪成」。

David開始懷疑自己俾人PUA

講講下，大家自然聯想到熊樹仁，Rebecca(沈可欣飾)直頭話David係被PUA受害者之一， David雖然幫樹仁講好說話，堅稱佢「唔會用手段控制自己」。

返到屋企，David想食壽司，樹仁硬要食薄餅；想薄餅唔好加菠蘿，樹仁堅持要菠蘿，結果最後又係David遷就晒，佢忍唔住爆一句：「乜都係我就你，你就我一次唔得咩？」心入面正式起疑：「佢係咪真係尊重我？」

尚善「感情測試班」搞到個個爆雷

David開始動搖，於是搵尚善(滕麗名飾)幫忙，尚善乾脆開咗個「感情關係檢測」session，一次過叫Jason、Gigi，仲有熊樹仁、David入房「面談」，問晒一系列情侶必殺問題：第一次約會時間同地方；對方有咩唔食、過敏；每日最期待嘅事係咩；最驚失去啲乜。

Jason雖然渣，但至少識答「最驚失去Gigi」，勉強有線索表示佢真係鐘意個女朋友。

到熊樹仁出場就災難級：記錯約會時間、唔記得David對花生過敏，仲話每日最期待係「返工」、最驚失去係「硬碟壞咗」。

David聽到硬碟果下，個心直接插水：「原來你最驚冇咗啲相，多過驚冇咗我？」

David決定請假離開，點知轉頭收到噩耗

被測試轟炸完，David心情一落千丈，佢想請長假，話要離開熊樹仁，冷靜諗清楚兩人關係，不過，電話突然響起——David得知熊樹仁入院，嚇到即刻衝去醫院探人。

真相翻盤：原來大叔記得晒，只係講唔出

熊樹仁醒返之後，第一件事就係拎出一條吊墜，講到明係「用性命換返嚟」，因為今朝買完吊墜，貪快行後巷返公司，遇到打劫，佢情願被打都唔肯將吊墜交畀賊，話呢條係買畀女朋友最後一條，點都要保住。

David聽到又嬲又心痛：「你傻嘅？俾佢咪算囉！」但心入面其實已經軟晒。

之後先揭開關鍵真相，原來之前被認為嘅直男行為，都係有原因！而且，熊樹仁對好多細節，其實記得超清楚，只係要靠睇返佢影嘅相片記起，原來之前話怕「硬碟壞咗」，只因怕失去所有與David嘅相。

David聽到之後，完全崩潰式認錯，發現原來自己係用「測試」令感情走歪，真正問題唔係對方唔在乎，而係對方表達能力直男到爆。