愛回家之開心速遞第2716集｜富豪宣言：越叻嘅女人就越要征服佢！

【愛回家之開心速遞第2716集】Coupon爭霸戰

今集《愛回家之開心速遞》2716集劇情，可以用一句總結：三太(樊亦敏)暗地裏做Coupon女皇行善，老公大龍生(羅樂林)又追佢又想打低佢，結果變成一場又好笑又火滾嘅優惠券大戰。

三太暗做Coupon女皇

大龍生迷上神秘「Coupon女皇」，佢死心不息要KC (歐瑞偉)幫佢約呢位女皇出嚟見面，話鍾意同「有智慧嘅女人」傾下偈，為咗見佢，仲請私家偵探查，先知道對方公司喺查梧島登記，難怪點查都查唔到真身。

而真正嘅Coupon女皇，就係平時成日俾人笑打麻將、貼滿膠布嘅三太白天娥。

佢同Win Win (莊思明)以及幾位師奶員工，喺寫字樓剪實體優惠券，專幫冇智能電話、唔識上網嘅公公婆婆，等佢哋攞住紙本優惠券開心慳錢，仲會請大家食飯，當員工作家人咁對。

身份幾乎穿煲

有一日，Win Win遇到大龍生帶Joe巡鋪，行到樓上新租單位門口，話要借洗手間用。

三太喺裏面聽到把聲嚇到收埋，大龍生覺得裏面把聲好似阿娥，又問公司叫咩名，大姐差啲講漏嘴，多得Joe (何晉樂Rock)急急腳扯開話題，拉老竇去廁所，先至有驚無險。

Joe好快拼埋所有線索，發現原來媽媽就係爸爸朝思暮想嗰位女皇。

三太想順勢叫仔仔接手生意，話係上天安排，Joe就死口唔肯，話自己IT小毒毒，唔識應付師奶，又強調要靠自己實力創出事業，唔想行捷徑，母子對話又好笑又有少少暖心。

粗口短訊引爆戰爭

三太最大壓力，就係KC日日收到大龍生訊息，要佢約「Coupon女皇」出嚟見面。

Joe自信滿滿話：「等我覆，保證佢以後唔再煩你哋。」結果用咗超惡態度回覆，將女皇扮到好串。

大龍生睇到訊息嬲到爆，即刻拉黑對方，仲立志要開自己優惠券公司，打到女皇倒閉先肯收手。

佢仲指名要Joe負責呢盤生意，Joe心入面知道玩大咗，只好半推半就應承，希望搵機會搞爛件事，幫媽媽止血。

名門正派出場，三太公司捱打

Joe原本打算拖字訣，話公司名好重要，可以諗兩三個月，慢慢hea。

點知大龍生搵嚟幫拖嘅竟然係大小姐(林淑敏)！大小姐一出場就宣佈公司叫「名門正派」，話已經註冊好，仲收集晒各大商戶、糧油雜貨、家庭用品同接龍自家獨家優惠券，誓要一開始就壓死「Coupon女皇」。

與此同時，三太公司就愈來愈慘：廣告商俾大小姐搶走，冇獨家優惠又冇廣告收入，出糧都成問題。

為咗員工生計，三太叫佢哋去名門正派面試，點知大小姐寸爆人哋學歷、人工，態度超差，最後啲員工寧願留喺三太身邊捱到最後一刻，都唔願幫大小姐，一句「寧吃開眉粥，不吃愁眉飯」講晒忠誠。

雷公落廣告，女皇翻生

三太為咗頂住公司，忍痛叫Win Win幫自己賣心愛飾物，話物件冇咗可以再買，但姐妹要養家，先係最重要。

啲員工收拾行李嗰陣，仲想留低剪優惠券剪刀做紀念，希望有日三太東山再起，再幫手打拼，場面雖然輕鬆講笑，但其實幾窩心。

正當大家以為公司真係要執笠，突然收到雷公(白彪)傳來消息，話要喺「Coupon女皇」度砸大錢落廣告。

三太一聽到雷公係大龍生死對頭，第一個反應係想拒絕，但Win Win同夥計勸佢：對方又唔知你係邊個，你係攞錢去幫人，兼且要向大龍生以本傷人嘅行為出返一口氣。最後三太決定收呢筆錢，公司正式起死回生。

雷公另一邊開香檳慶祝，話睇唔過眼大龍生欺負女人，所以特登出手幫「Coupon女皇」，教訓老對頭，話「敵人的敵人就是朋友」，心情爽到爆。

大龍生得知「Coupon女皇」公司竟然冇倒閉，仲靠雷公翻生，反而覺得呢個女人打不死、又有智慧，越諗越覺得「有挑戰性」，最後一句「我要征服佢」變成半商戰、半愛情宣言，為後續劇情埋下爆笑伏線。