家族榮耀之繼承者｜張鳳妮「喜極而泣五連環」演技大爆發 為演「機心二房」睇至少3次劇本

《家族榮耀之繼承者》昨晚（16日）播出的第五集，焦點絕對是智斌（羅子溢飾）主動與家碧（張鳳妮飾）相認戲碼。

延伸閱讀： 家族榮耀之繼承者劇情｜全30集劇透懶人包（持續更新中）豪門上演大惡鬥 佘詩曼/林峯/羅子溢/羅嘉良

當智斌得悉家碧才是親生媽咪後，對家碧態度180度變好之餘，並主動與家碧相認。當智斌說出家碧才是親生媽咪後，鳳妮姐的反應相當好戲！先是錯愕得雙眼直瞪，之後因為要強忍湧上來的悲痛及激動，鳳妮將整張臉及雙眼谷得又腫又紅，加上緊抿的雙唇，相當有感染力，而最後的低頭掩飾悲傷，再岳高頭強忍淚水開心地笑，亦是劃龍點睛之作。之後，兩母子到佛堂佛堂拜祭祖先，當家碧應智斌要求說出「調包」真相時，雖然往事不堪回首，但為了不讓兒子痛心，家碧全程強忍傷痛地故作淡然，但哽咽的聲線卻出賣了她的真實感情。當見到兒子如此生性，更親口嗌她媽咪時，鳳妮又再大晒好演技，成功演繹「於笑臉跌出淚水」的莫名悲痛感，但又依然立體演繹出濃濃的母愛，難怪獲網民大讚：「演技大爆發」。

1987年憑藉參選香港小姐進入娛樂圈的鳳妮，較令人深刻的劇集作品有《同居三人組》、《餐餐有宋家》、《天地男兒》及《苗翠花》等，當年被認為演技不俗的她，如今在《家族榮耀之繼承者》演技再受肯定，網民更大讚她演繹豪門少奶入型入格：「戲內戲外都演活了少奶風範。」其實鳳妮為了演出《繼承者》確是花了不少功夫，雖然鳳妮飾演的家碧看似人畜無害，但其實暗藏「機心」，除了不時在綺婷與守仁太太朱麗琪（陳靜飾）吵鬧時暗爽外，在第一集眾人等候宣布集團代主席人選時，一心覺得智斌會「當選」的家碧全程忍不住流露暗喜神情，每個細節位都精雕細啄，相當用心。鳳妮受訪時，坦言事前做足功課，在正式鑽研角色前已看了三次劇本：「呢個角色好大挑戰，所以我先接拍。功夫我做得好足，但未做到最好。我初初睇劇本，頭兩次係當故仔咁睇，去了解（角色）頭段、中段同Ending嘅分別。之後再每個場口去mark應該點做，同埋我盡量唔想做到咁乞人憎，所以我對三個小朋友（梁靖琪、陳瀅、羅子溢）都一視同仁，希望令到角色睇落有少少可憐嘅感覺。呢個角色對我嚟講難度非常高，我都仲未能夠做到最好，希望觀眾睇咗之後畀啲意見我。」

鳳妮坦言起初入劇組狀態不太好，並感謝子溢帶她入戲：「我初初入組時，好多場都唔係好入到戲，好彩都唔係重頭戲，係我仔子溢係帶到我。最難忘嗰場，係我帶佢見我已過身嘅父母（第五集），嗰場戲主要都係我講對白，子溢冇乜對白，不過佢畀我嘅反應係開始眼紅、熱淚盈眶，然後捉住我隻手，呢啲畀到我好足嘅戲，我可以跟住佢嘅情緒做反應，到佢叫我阿媽時，我就有眼淚流到出嚟。呢場戲好似第四、第五日左右拍嘅，我拍完就好似開咗竅咁，個人安心咗，啲戲之後都做得放咗，因為我知道子溢可以帶到我戲。」