由林肯監製、黃秉怡編審的《婚後事》（《Happy Ever After？》），第十四集上半敘述視點是天暉（羅天宇飾），標題是「盡情燃燒 不枉此生」；下半敘述視點是善仁（羅子溢飾），標題是「唯有愛 才令人自覺不枉此生」，兩個都是不枉此生，但不枉此生的原因卻各有不同。
第14集有個有趣花絮，就是善仁吐血暈倒後，意識回到年青時的自己目擊母親自殺一幕，並與年青時的自己同框及對話，以帶出多了人生歷練的善仁，回望過去希望自己不要再將太多無謂的包袱孭上身。該幕特別之處，是年青版善仁不但大部分時間只以背脊出鏡，全程個樣更是「朦查查」，嚴格來說根本看不清由哪位演員飾演。話雖如此，但仍有眼利網民看出該名演員是曾被指撞樣羅子溢的孔德賢（Danny）。
Danny受訪時，坦言自己正是「朦查查潘善仁」，並笑言當時是專誠抽空參與拍攝，背後原因更與子溢有關：「嗰陣時我其實拍緊《你好，我的大夫》嘅，跟住林肯就問我話有個角色想搵我做，就係子溢年輕版，但講明係blur blur（朦朦地）地同唔係好出，問我做唔做。我一聽到就即刻應承咗，因為首先監製其實都畀咗好多次機會我啦，《香港愛情故事》同埋《青春不要臉》都有搵我拍，同埋我覺得都幾得意吖，啲人話我似鄭嘉穎同埋似子溢，咁我做過鄭嘉穎年輕版，不如做埋羅子溢年輕版啦，好似幾好玩咁，我真係冇乜所謂嘅。我都有見到啲網民話：『嘩咁似Danny嘅！』冇錯，就係我，希望觀眾會覺得投入到啦，同埋善仁同年輕嘅自己和好呢段戲會夠出，我自己blur唔blur真係冇乜所謂，作為一個演員其實，淨係要我背面，唔出我個樣我都OK。」
