:quality(80)/public/tvbcom/article/images/202504/7cafd005-6dcd-49ee-b03a-53a8c979d6f1.jpg)
《奪命提示》昨晚（31日）一集開出的「五大乾屍奇案」極盡官感震撼，除了緊張的查案進程，其實還有不少輕鬆吸睛場口，首推絕對是劉穎鏇阿Tiff與振朗的「愛恨纏綿」戲碼。劇情講到對前女友嘉莉（劉穎鏇飾）未忘情的俊朗（張振朗飾），雖然多次捨身勇救女方，但由於三年前在結婚當日玩失蹤傷得女方太深，嘉莉即使對俊朗還有感情仍不願意再邁進一步…為了重新點燃起嘉莉愛火，俊朗找來靚女同事林志美（梁凱晴飾）上演親密戲碼大玩「激將法」，可惜未成功已遭嘉莉識穿兼反被整蠱…
在俊朗反被整蠱場口，劇集「搞笑擔當」張振朗再度施展肢體系＋表情系搞笑功夫。首先在迎戰阿Tiff主動真‧飛擒大咬場口，振朗先是露出一副既驚且喜的急色表情；之後在等待阿Tiff「回歸」企圖再進一步時，半裸上身、只穿著蕉蕉孖煙囪的振朗，不但風騷地邊照鏡邊戴上貓耳頭箍，還以雙手掩著重要部位，瘋狂搖擺pat pat大跳「勝利艷舞」，無論得戚陶醉表情、抑或香艷不足、搞笑有餘的動作均喜感十足，獲網民封為「張家輝2.0」。無綫官方網站昨晚上載相關場口Full version版本（相關連結：https://bit.ly/3XEfuNZ），片段中振朗的抵死跳舞鏡頭更加多元，值得留意。
談到「勝利艷舞」，張振朗接受TVB.COM訪問時坦言拍攝時相當怕醜，並感恩Jazz盡力清場拍攝給予空間，令他能更自在地自創搞笑舞步：「可能演繹上大家覺得我好enjoy，但我想話enjoy嘅唔係我，係個角色啫。平時我係唔跳艷舞嘅，所以要跨越個心理關口都幾難，但入咗個角色就會好啲咯。嗰日基本上可能得一個cam man跟拍，或者只係棟一部cam喺廁所度，等我自己一個好自在咁自由發揮，但我係唔會再跳到第二次艷舞架喇。」談到在《奪命》展現的喜感獲網民支持及肯定，已有一段時間沒有拍喜劇的振朗，坦言自己也很開心：「今次隔咁耐再演喜劇我自己都玩得好開心，現場氣氛都好好。」
張振朗親解背部現離奇紅印：係肉搏場口留下嘅痕迹
場口另一亮點是振朗之前在劇集宣傳活動上預告的被阿Tiff真摑了八大巴的場口！雖然鏡頭前阿Tiff只摑了男方兩大巴，但該兩吓巴掌打到「啪啪聲」之餘，振朗臉上亦留下清晰紅印，力度可想而知。談到背部同樣驚現清晰紅印，振朗坦言是與阿Tiff肉搏後留下的痕迹：「我本身係好易紅嘅人。」振朗又補充指被飛撲場口，劇組有安排枕頭隔開他和Tiff，讓二人拍攝時可以免卻尷尬。昨晚振朗另一搶韁場口，是阿Tiff接他出院一幕；雖然只是簡單的調情場口，但向來用心鑽研演戲、兼鬼主意多多的振朗，竟出奇不意大玩「震波」，雖然時長只有十秒，但粗略估計振朗震波次數至少有八次，胸肌相當靈活。對此，張振朗笑言自己天生有震波能力：「天生係有呢個能力嘅，場口啱就擺咗落去用咁解。」
