刑偵12｜王菲力壓對手獲演「年青版陳法蓉」機會 四日重覆淋雨＋瞓泥地最難忘

在《刑偵12》飾演丁少芸（陳法蓉飾）年青版的王菲，雖然佔戲不多，但由於樣子漂亮清秀，加上被殺死一幕極具視覺震撼，故仍吸引不少網民注意，而劇集監製巢導亦大讚王菲相當專業，為了配合拍攝，死亡一幕足足拍了四天之多，而且全程零怨言。

延伸閱讀： 刑偵12｜全25集劇透懶人包（持續更新）林保怡/張振朗/陳法蓉/傅嘉莉/曹永廉/陳自瑤 破驚天懸案

談到獲巢導相中演陳法蓉年青版，王菲接受TVB.COM訪問時坦言很開心：「因為我知道巢導Cast咗好多個女仔，但係佢最後都揀咗我。因為我個角色主要係回憶部份，所以就好少機會可以同法蓉姐姐同場，唯一得一場同場，嗰場我有乘機觀摩法蓉姐姐佢點樣演繹呢個角色。」王菲笑言被殺場口是她入行以來拍過最難忘的一場戲，一來拍足三、四天，二來拍攝環境惡劣：「天氣好熱，跟住又要瞓地下、又要淋人造雨。因為要配合番拍出嚟嘅效果，我記得場淋雨戲哋同一日都take咗好多個take嘅，同埋好多動作亦要就番用唔同嘅角度去拍。」

王菲續指由於拍攝需要有「濕身」和「乾身」的造型，故此每次重拍的整理功夫也相當費時：「因為我件衫淺色，瞓完落地下會黐到啲泥、成個背脊黑晒；跟住又因為要淋雨所以好快又濕晒，底衫褲鞋襪全部都濕晒，但為咗下一個take，你又要抹番乾淨晒成個人去再拍，所以最辛苦都係啲服裝姐姐，佢哋要幫我手一齊印乾同吹乾個人。所以嗰兩日，我可以話係不斷又乾又濕、又濕又乾咁重複咗好多次，三、四日都係重覆緊做同一件咁樣嘅事，但見拍出嚟效果好，就覺得幾繁複都值得。」