刑偵12〡王嘉慧演「機警主播」獲讚入型入格 透露參考一知名女主播學習大方淡定感

王嘉慧（Cathy）這次延續《新聞女王》中的主播角色，為SNK主持直播訪談節目，亦相當有趣！而Cathy這次在《刑偵12》中坐在主播席的時間，比起在《新聞女王》中多得多；而Cathy亦有好好把握是次演出機會，將機智大方的主播Sharon演得入型入格，無論接Cue抑或強裝鎮定等情緒轉折均表現自然；加上一身白Suit主播Look得體漂亮，以及修長白滑美腿甚是吸睛，難怪獲網民封「美腿女王」。

談到繼《新聞女王》後再續主播緣，Cathy坦言「好開心」可以再以主播身份跟觀眾見面，並笑言一收到劇本時，已覺得場口相當緊張吸引；Cathy接受tvb.com訪問時笑言：「同埋好感恩可以同咁多重量級嘅前輩同場兼對戲，即係保怡哥、振朗、高鈞賢咁。我記得拍嗰陣係舊年八月，當時我仲未有喺《東張西望》坐廠嘅經驗，都係做外景主持比較多，但我覺得呢兩、三年《東張》外景嘅訓練對我都好有幫助，尤其今次有啲場口係要對住鏡頭講嘢，咁因為我平時都習慣咗咁做，所以感覺就做得自然啲。」

Cathy續指其實早前拍攝《新聞女王》期間，已開始參考不少女新聞主播的報道片段、或專訪式訪談節目做功課，學習主播/主持的body language及講嘢tone。問到哪一位主播/主持特別Inspire到她，Cathy笑言：「其實我冇話刻意去模仿邊一位主播，但係我會成日睇黎在山做主播嘅片，因為我覺得佢畀人一種好高貴、好優雅同不慌不忙嗰種感覺，我好想模仿到呢一種淡定大方嘅感覺。」Cathy又笑言這場於廣州電視台拍攝的場口，既難得又難忘：「因為真係好少可可以去到一個地方咁大嘅電視台度參觀，另外係入面嘅冷氣真係開到好足，第一日我唔知係咁，所以淨係著住套白色suit去開工，但因為拍咗好多個鐘，跟住就愈拍愈凍，令我明白到靚嘅背後真係要付出好多，哈哈。」

港姐出身、自主持綜藝節目《通靈之王》後人氣急升、工作浪接浪的Cathy，背景相當猛料！父親有「內地傢俬大王」之稱，是著名傢俱公司創辦人，擁有約300多間加盟店。王嘉慧自己本身除了是一名學霸，（在倫敦大學學院修讀心理學，以一級榮譽及「Dean's honours list（獲院長嘉許名單）」成績畢業；回港後在香港中文大學讀法律系碩士），還有健身教練專業資格，另外無論畫畫、手作首飾、珠寶首飾設計、食物繪圖、櫻花繪圖、人手縫紉也難不倒她，堪稱「藝術全能」。