俠醫｜鄭子誠演「良心奸角」獲洗版式好評！謙稱幾生修來親口感激觀眾厚愛：畀人鬧同畀人讚只係一線之差

《俠醫》播出的第19集，爆出了結局周的一大高潮。原本與阿仔鄧世鏗（丁子朗飾）拍住上搞風搞雨的力圖（鄭子誠飾）（實際是跟阿仔指示做壞事），因世鏗將其親姊淑歡（盧宛茵飾）推落樓梯感內疚不已、加上有感世鏗已走火入魔、遂逼世鏗向淑歡道歉兼自首。

豈料世鏗不但死性不改，還逼力圖為他頂罪，更在阿鳳（江欣燕飾）面前爆力圖偷食一鑊熟；兩母子聯手將力圖逼埋死角之餘，阿風更發狂撲向力圖，混亂間阿鳳意外被力圖撞暈，世鏗則刀插力圖，生死未卜，劇情相當驚爆。

「有時我都唔覺得自己做得好，每次都有改進空間」

談到今次飾演「良心奸角」及昨晚的「父子惡鬥」贏得洗版式好評，鄭子誠接受官方專訪時坦言感激網民及觀眾厚愛：「我唔知哪裏修來的福氣，咁多年喺演藝生涯做咗好多好衰嘅角色，其實畀人鬧同畀人讚只係一線之差，但佢哋選擇去鼓勵我。有時我都唔覺得自己做得好，每次都有改進空間，但佢哋每一次演出後嘅comment，大部分都好有鼓勵性，今次都一樣，衷心多謝佢哋。正正係呢樣嘢，令我更加唔想辜負佢哋，所以我每一次都諗點樣做到最好。」

笑言畀丁子朗插足幾十刀

鄭子誠又謂「父子惡鬥」的拍攝過程相當難忘，並笑言不但被丁子朗插了幾廿刀，及被江欣燕摑完又摑才過關，還因一輪嘴力歇聲嘶鬧人，以致鄭子誠聲都沙埋：「呢場戲互罵仲要有動作過程，要拿捏走位、對白，我又要一輪嘴係咁鬧人，其實都相當辛苦。一來要畀欣欣冚、我都畀佢冚咗幾巴，同埋畀丁丁插咗幾廿次，大家先睇到尋日嘅成果。我仲記得我要一輪嘴力歇聲嘶咁鬧佢哋，因為我哋分咗好多次唔同angle去拍、我每次都好用力去做，加埋NG，拍完出嚟我把聲沙晒。我記得嗰日拍完仲要返電台做節目，我把聲直情走音咁滯。但拍出嚟大家欣賞，都係一種安慰同覺得值得。」