俠醫｜鄭子誠半分鐘自摑戲拍到虛脫！奸足30年仍期望奸出新鮮感：今次想演搞笑鹹濕佬

《俠醫》昨晚一集鄧氏父子鄧力圖（鄭子誠飾）及鄧世鏗（丁子朗飾）企圖謀奪菊婆婆（程可為飾）的舊式物業不果，還因而要背負極大銀碼的金錢損失，為了自救，鄧力圖到家姐鄧淑歡（盧宛茵飾）及凌為民（陳豪飾）家中求救但慘遭冷待；為了達到目的，力圖全程像喪家犬一樣卑躬屈膝、搖尾乞憐，更連環瘋狂自摑搏同情，每一下都摑到啪啪聲，相當震撼！

談到該場加埋不到半分鐘的自摑戲，鄭子誠接受官方訪問時直指拍到虛脫：「真係拍得好辛苦架我仲記得，因為都拍咗好幾次！開頭嗰幾次，監製覺得我摑得唔夠盡，咁所以我就更加落力地摑自己，結果力歇聲嘶底下完成，拍完之後差唔多成個人虛脫咁滯。」

獲封為「完美奸人」的鄭子誠，從演30年以來飾演過不少經典奸角，代表作有《真情》的李子浩及《封神榜》的紂王等，鄭子誠的成功，是每次只要一在劇集中出現，網民都必定覺得他有陰謀，相當搞笑。

以奸人演到出神入化的鄭子誠，透露這次在《俠醫》中雖然又再演奸人，但依然嘗試希望奸得嚟有新鮮感，所以這次加入了「懦弱」及「渣男」元素：「以前我做嘅奸角角色，都係比較強勢啲嘅奸角，今次係一個好懦弱嘅渣男...畀老婆騎住啦，個仔又睇唔起啦！變咗其實奸唔到啲咩出樣，好多時都係衰鹹濕，同埋就算有陰謀，呢種陰謀都畀阿仔睇穿晒，係嗰種好膚淺嘅陰謀！」