:quality(80)/public/tvbcom/article/images/202509/cabff99e-1126-47b9-8cf5-ffe6f682cc3a.png)
獲網民點讚具體而又貼地地描寫了人性黑暗面的《俠醫》，絕對可以「衰人當道」形容，除了機心搶生意地產女阿Nat（劉佩玥飾）、咸濕衰格上司司徒信（林溥來飾），還有丁子朗、鄭子誠及江欣燕「三父子」組成的「壞蛋三人組」，佢哋一個「智慧型奸仔」、一個「好色懦弱型奸佬」，而欣欣則係「毒舌衰貴婦」，位位都入型入格，吸獲不少網民關注，當中欣欣更獲封「Mean精天花板」！
欣欣在《俠醫》中飾演囂張、狗眼看人低、使人同鬧人都唔使本的有錢濶太甘雁鳳，每次開口唔係鬧人寸人，就係以極不耐煩tone吩咐人辦事：「快啲攞嚟啦」、「攞對鞋入廁所吹乾佢！」欣欣在頭三集雖然出場不多，但每次現身都很精準，聲線氣場夠晒霸氣之餘，刻薄金句亦是多不勝數。以欣欣出場一幕為例，由於張曦雯飾演的地產經紀Rachel遲大到，等到發晒火的欣欣一輪嘴連珠炮發：「你捨得嚟喇咩？你當我哋咩人，你知唔知我等咗你幾耐？人做地產、你做地產，你冇時間觀念架？你冇錶架咩？」、「叻你就唔使做地產妹啦」、「佣你就識收，嘢你唔使做呀？」
而在第二集與陳豪一家的同枱食飯戲，欣欣則完美演繹了「藐嘴藐舌」教科書級表情，每次只要陳豪發表仁義道德理論，欣欣不是陰陰嘴恥笑、就是毫不留情地反白眼；面對馬貫東的幫口，欣欣更是零客氣一嘢喝埋去：「呢度幾時輪到你出聲？」、「做咩，你唔夠講發爛渣呀」、「我走先喇，呢度留番姓鄧嗰啲慢慢傾啦！」尖酸嘴面令人見到都激氣。
:quality(80)/public/tvbcom/article/images/202509/a38b6f70-0d4c-411a-8591-42ec6a1223c7.jpeg)
欣欣接受tvb.com訪問時，笑言有份捧場的江媽媽，亦直接欣欣「好乞人憎」：「我媽媽係無綫忠實fans嚟，我梗係問佢意見啦，佢就話我『好乞人憎！似你平時啲衰樣。』其實嗰場戲我係諗住做衰啲嘅，但冇諗過咁衰。」欣欣續指該場食飯戲其實是她首日開工拍攝的，《俠醫》亦是她首度挑戰奸角，難免擔心拿捏不準確、演繹過火，故拍攝時十分緊張：「做好誇張，我好叻嘅，但都驚過火，加上第一日開工…所以我一接到劇本後日日都問監製April，使唔使減啲（嘴面）？好大壓力。」
欣欣續指拍攝時因時間緊逼要「飛紙仔」，變相一邊開工、一邊背誦「未來對白」變成她的日常：「飛紙仔其實唔掂架，因為我好多時成版幾嘅對白都係我一個人講晒，又要講得快，點算吖？！嗰時個個都覺得我癲，有日子誠問我：『你背緊咩』，我話背緊後日嘅對白，佢話：『吓？今日都未搞掂喎』，我就話我後日要鬧人、仲要一輪嘴好順咁，所以唔背定唔掂，嗰時又要應付即日對白、又要背埋之後嘅對白，都幾精神分裂。」欣欣又謂即使有些場口會自己因應當時氣氛及情緒心血來潮爆肚，但基礎依然是必須將劇本背到滾瓜爛熟：「唔可以作架嘛，唔係吓吓作得切咁快，我作到一個shot、作唔到十個擺位。不過有時都會有神來之筆，好似睇樓嗰場，因為子誠遲遲都未接對白，咁我唯有一輪嘴係咁鬧落去，但我平時真人絕對唔係咁，好少鬧人，但嗰排為咗投入角色，見人就鬧，我係好入戲嘅人。」
欣欣還提到當年如何向「惡女始祖」關菊英請教兼偷師：「又陰毒又乞人憎，我心目中首選係關菊英《溏心風暴》入面嘅角色。我記得播《溏心》嗰陣，我拍緊《同事三分親》，我喺停車場見到菊姐，因為拍《歡樂今宵》識，我就問菊姐點樣做得咁好。佢就話一定要好熟啲對白，要行又睇、食又睇、去街都要諗住諗住，講到佢順晒為止，畀火辣都唔甩（啲對白），咁就掂喇。因為熟晒啲對白，就變咗點做都得，我自己會熟埋人哋嗰啲對白，一來知道咩時候要接，二來人哋一時漏咗仲可以溫提埋對方。我以前拍過電影，電影唔係成堆人喺晒度拍架，一個人一日要拍好多場架，唔熟劇本點做到。」雖然要不斷背劇本，但敬業樂業的欣欣，依然享受做演員：「要抱住玩嘅心情去演戲，唔好有壓力，演員係一個好玩嘅行業。」
