愛回家劇情｜劉丹羅樂林憶制水日子勁悽慘 親揭當時排隊裝水情況 「諗過度過」用每一滴水超艱苦

現實中劉丹和羅樂林同樣經歷過60年代百年一遇的旱災，每四天供水一次，每戶大呼「樓下閂水喉」成為街頭巷尾不絕於耳的聲音。對於這段制水經歷，二人接受TVB.COM訪問憶起均以悽慘形容，正正因為經歷過才明白水的可貴，更懂得珍惜。

劉丹憶述當時眾人家中也會放置兩個大桶裝水，幸運的是他因住在警察宿舍樓層不高兼水源頭較猛，因此當有水那天，一開水喉很快便可裝滿水。

不過有些住唐樓的市民並非那麼方便，劉丹說：「因為大家一齊開水就會唔夠力，令到住樓上嘅水壓升唔到上去， 所以好多時就會大叫『樓下閂水喉』， 因為要閂咗個水喉先可谷到個水壓，如果唔係4日都接唔到水，就好陰功。」

他又指那時要到街外的「街喉」取水，對於當時排隊取水的畫面依然歷歷在目，「啲細路細細個就挽住個水桶出嚟排隊， 嗰陣時真係好慘， 4日先供一次水。」

而且，劉丹指當時場面十分混亂，經常出現插隊打架的情況，「啲人一知道有水車嚟 ，一早就會擺晒啲桶喺度，但又要搵人睇住，所以有時就會搵啲小朋友睇，當大人返到嚟個小朋友就喺度喊，個桶又唔見咗，因為有啲衰人會蝦啲小朋友，亦會踢開其他人嘅桶，所以好多時發生打架嘅情況， 後尾要警方派人睇住先有改善， 嗰種痛苦日子諗起都驚。」

正正因為只有限量的水，劉丹自言一家人用水時都會「諗過度過」善用每一滴水：「有時天氣熱，但邊有咁多水可以沖涼，所以就拎一盤水嚟抹身，嗰盤水抹完都變晒色， 嗰時真係好慘，4日一次水，所以只有一個水缸，一個桶，每次𢳂一殼水，都要諗清楚點用，好似洗米要洗幾次，當時只係洗一次算，再留番啲水抹嘢。」

他直言昔日的艱苦回憶有經歷過的人便會明白：「有時男人返晒工，得番婦孺喺屋企，見到佢哋挽住兩桶水又要拖住啲細路，樓下擔水上樓嗰種痛苦，真係好慘，所以落一場雨 ，大家就好開心覺得有救，嗰種痛苦 ，依家啲年輕人唔知㗎喇！」

直到東江水的引入，現時一打開水喉就有水，一切得來不易，劉丹深表認同，更指自小已教導子女和孫女要節約用水，「有時見到太太洗面，水喉開大咗我都會話佢唔使開咁大水，希望大家要珍惜用水，東江水真係得來不易，唔係用之不盡。」

至於羅樂林回想那段制水的日子，自言雖然當時經常要中港和澳門四處奔走，惟對「樓下閂水喉」仍然十分深刻。

他直言也試過要排個多小時取水，水對他們而言特別珍惜：「雖然嗰時都仲細個，記憶唔係好深 ，但記得都係要排好耐，好似依家香港有時水管爆咗，有水車嚟都要排隊拎水，但最多半日就會有番水；以前用水真係唔容易，我哋有經歷過嗰個年代嘅人會更明白。」

羅樂林指昔日用水時也要「計住」：「每一殼水都盡量會用盡佢，例如洗完面或沖完涼可以用嚟淋邊度， 每次會計清楚，唔可以一用完就倒咗去。」

他指經歷過那段制水日子感受特別深，所以他希望大家學懂珍惜用水，「因為東江水嚟得不易， 要經歷咁多嘢先可輸送到嚟香港 ，依家我都經常同屋企嘅工人姐姐講用水時，唔好成日開大個水喉，咁做非常浪費。」

「其實唔單止用水，大家要記得任何嘢都唔容易， 要識得唔好浪費。」羅樂林說。

1963年，香港遇上百年一遇旱災，連續九個月的乾旱逼使政府實施最嚴厲的制水令，由1963年5月2日起，每日供水3小時，16日起改為每兩日供水4小時，6月時更進一步改為每4天供水一次，每次4小時，制水措施至一年後颱風帶來暴雨才取消 。

為解決雨量不足、不穩的挑戰，香港自1965年起輸入東江水，以滿足本地用水需求。東江是珠江3條支流之一，發源於江西省的尋烏、安遠和定南縣，自東北至西南方向，流入廣東省境內，主要供應河源、惠州、東莞、廣州、深圳及香港超過4,000萬人。