女神配對計劃｜葉蒨文否認節目做假有劇本 直認每個選擇決定百感交集：唔好對女神們咁苛刻

她指與幾位女神和製作團隊一起看直播，自己也看得很感動，更表示男嘉賓的表現令其十分欣賞：「其實有少少唔記得咗發生過啲咩，例如原來曾展望真係同林子祥同一日生日，同埋原來賺錢唔多，可以過少啲隧道減輕使費，男嘉賓們嘅口才同急才睇返都有再次charm到我，畢竟我係鍾意有啲幽默感同埋轉數快嘅人。」

葉蒨文否認節目做假有劇本：「我發現睇播出同埋當下親身經歷個感覺真係好唔同，觀眾睇到嘅係剪完出嚟嘅片段，又有晒配樂，可能好多觀眾會質疑其實咪又係做show ，你哋睇就一個鐘，女神們係真係坐咗喺嗰度兩日，由朝到晚去進行了解、篩選。」

她續說：「其實我哋同男嘉賓都係人嚟㗎，人都係感情動物，仲要咁多素人點樣演戲呢？仲要一個二個女神瘋狂插嘴講嘢，大家因為friend你一言我一語，咁鬼多碎嘴神助工點樣有劇本啊？我哋係真係真誠咁樣去了解男嘉賓！」

葉蒨文指拍攝事前完全不知會做甚麼，也不知有誰出現，「好多做決定嘅時候，我哋係百感交集，選擇與否、撳燈與否，有時真係一念之差，希望觀眾都記得我哋其實真係活生生用自己來經歷緊呢一切。希望大家會去欣賞當下嘅呢一份真實感，唔好對女神們咁苛刻。」

最後她感激大家瘋狂留言祝福，相信大家激烈的討論全因大家看得十分投入：「希望你哋繼續好好享受呢個節目，但係！… 希望都俾啲空間女神同男嘉賓互動，啱啱開始姐，唔好咁快叫我結婚生小朋友，想順其自然，多謝多謝。」