佘詩曼自爆《新聞女王2》造型試足十個鐘 因一事「投訴」吳業坤冇大冇細

視后佘詩曼昨日（27日）與譚俊彥、蔣祖曼和吳業坤和總監製鍾澍佳等人，為《新聞女王2》進行圍讀。當中蔣祖曼為新加入的成員，她接受《東張西望》訪問表示：「有得拍《新聞女王2》超開心，但係最開心竟然係我屋企人，我媽媽超開心，仲叫我學一下人家演戲，學一下人家點樣做人。」

佘詩曼在第一輯《新聞女王》的劇中造型打扮成為網民關注，更大讚其每個Look也能盡現「Man姐」霸氣，今次第二輯當然同樣令人期待，阿佘自爆早前已進行第一次造型：「試咗好多，搞咗10個鐘都未試晒，所以大家拭目以待。」

期間阿佘竟「投訴」吳業坤圍讀時冇大冇細，她說：「對稿嘅時候，佢要問我一啲問題，之後佢話喂，其實如果咁樣，跟住我就話Man姐都唔叫聲，叫喂。」

之後吳業坤即解釋：「因為我哋拍完之後，我哋都變得很要好，所以剛才對戲嘅時候，有啲用咗朋友嘅態度嚟講對白，要調整一下。」

不過其實阿佘也是開玩笑，她向來提攜後輩，跟她合作過的拍檔及後輩，均對其讚口不絕，除了讚她沒架子，為人友善、慷慨外，更不時「袋錢」他們袋，演戲上給予不少寶貴意見。

另外，在第一輯翻巴士一幕，非常精彩，問到今輯再翻什麼，總監製鍾澍佳預告更加震撼：「我們對稿講到嗰度，大家都問我到時會點拍。」

至於阿佘亦在網上甫出圍讀相，發文表示：「事隔一年，全新嘅故事，熟悉嘅面孔，一樣又不一樣嘅感覺，『新聞女王2』正式啟動。」大批粉絲指非常期待，更指「Man姐」正式回歸！

延伸閱讀：佘詩曼設宴請客飲到面紅紅 坐正C位被一班視帝小生包圍做女王