Bob林盛斌接老人院Job遇騙徒考慮報《東張》 事件離奇掀熱議

事緣Bob早前接到單job，有一位自稱是老人院負責行政的「李先生」，希望找林盛斌做代言人拍廣告，他的經理人Karman與「李先生」傾好報價和合作方案後，本來打算到老人院視察實質環境兼傾拍攝內容，到達老人院之後卻被接待處職員告知： 『李生？邊個李生？我哋呢度冇呢個人。』 ，先知中招！

Bob一頭霧水，更稱考慮要報《東張》，為免有人再受騙，Bob在社交平台分享事件過程及感受。全文如下：

「呢件事，其實係要報東張嘅。話說早兩個禮拜之前，我經理人Kaman收到個查詢，對方李先生send咗張卡片過嚟，話係旺角一間老人院嘅負責人，對上仲有個院長，佢自己係第二把交椅，負責行政，佢話佢哋想搵我做代言人拍廣告，做吓宣傳，仲想我哋棋人做埋廣告公司去幫佢喺唔同媒體落廣告，然後Kaman同佢溝通咗好幾次，感覺都正常嘅，跟住大家傾到代言人價錢同埋詳細嘅工作內容，專登約埋個電話會議，我同對方直接溝通落實，咁Kaman仲好俾心機咁做咗一份合作建議書，分析埋俾佢知唔同媒體廣告嘅報價同效用亦都寫到好清楚喺代言人期間我會做啲乜乜乜，最後大家決定去馬，好開心，job confirmed！

如果大家認識我個經理人Kaman，都知道佢係一個好上心、好有交代、好有交帶嘅人，佢為咗確保所有嘢妥善處理同埋順利執行，佢約咗客戶、我、廣告導演上星期五下晝三點開會，因為Kaman想喺拍廣告同影宣傳相之前大家見一見面，順便睇睇佢哋老人院實質環境，兼傾一傾個拍攝內容，等大家可以好好準備同規劃之後嘅工作。

到咗上星期五下晝2:55 ，我哋去到呢間老人院門口，Kaman就打電話俾呢位李先生話俾佢知我哋到咗，然後對方話：『唔係約咗聽日咩？我啱啱出咗去，半個鐘後先返。』咁唔緊要啦，半個鐘啫，冇所謂嘅，收咗線之後，我哋就入去老人院嗰度諗住坐低等佢返嚟。好啦，高潮嚟啦……..入到去，我哋同接待處個職員講話我哋約咗李生開會，然後個職員就黑人問號：『李生？邊個李生？我哋呢度冇呢個人。』吓！跟住有位女仕行咗出嚟，佢叫林主任，佢同我哋講，原來過去呢段日子，呢個所謂嘅『李先生』，已經用過唔同嘅名字、身份、卡片同資料，利用佢哋老人院嘅名義去訂唔同嘅物件同貨品，甚至搵啲裝修公司話老人院要維修quote價，又試過book咗一個按摩師上到去話幫啲老人家按摩，林主任話呢張卡片嘅內容有啲係真，有啲係假，同埋其實之前佢哋已經報咗警，備咗案，喺呢個時候，Kaman不斷打電話俾呢個李先生，對方已經冇再聽電話，冇任何回覆。

呢一刻，我哋幾個人，進入咗懷疑人生嘅狀態。真係千年道行一朝喪，出嚟撈咗20年，第一次遇上呢啲點估都估唔到嘅劇情，喺度奉勸咁多位幕前同行，包括經理人同助手，原來呢個世界上真係會發生呢啲咁荒謬嘅事。我估一定會有人話：『下次收到卡片，都上網查吓間公司同埋電話係咪真，又或者打去人哋個總機度，check吓有冇呢個人囉！』講真，事後孔明就梗係容易啦，我都諗到啦，但係當每日都會收到唔同渠道嘅工作查詢，又真係好難個個都咁樣做，同埋如果真係打去，對方又係真嘅，又會搞到件事好怪同好尷尬。雖然我唔知道呢啲算係騙案定係惡作劇，亦都唔知道點樣可以叫大家小心避免呢啲事，總之，就係要執生啦，唉，黐鬼線！呢單嘢，真係好癲。」