90年代「性感女神」息影20年近況罕曝光 59歲狀態媲美少女 的士司機揭私下真實人品

關秀媚（Suki），1987年參加香港小姐競選入行，效力TVB七年拍攝過《大賭場》、《梟情》等劇集，其後轉戰電影圈的她，憑《千王之王2000》「Pizza」及《黑馬王子》的絕世好女友「沙律」等角色入屋，奠定其「90年代性感女神」形象。關秀媚自2005年後逐漸淡出娛樂圈，直到去年回歸大眾視線，積極經營內地社交平台與網民互動。現年59歲的她，無論是皮膚狀態還是身形依然fit爆，日前有一位的士司機發文分享捕獲關秀媚的驚喜經歷，更大爆女神私下真實一面！

該名司機在社交平台分享：「適逢有次揸特更，下晝四點咁上下係尖沙咀漢口道等緊燈位，見到對面有個女人向我揮手，心諗個樣咁熟口熟面，再睇真啲，我都幾肯定自己冇認錯人 。如是者離遠我就整咗個『OK』手勢，係呢位女客人上車之前，我已經諗好用咩開場白打招呼，如是者開始以下對話。

對方一上車，司機哥哥就化身Fans，大聲講出電影《千王之王2000》中的經典對白向女神打招呼：「鑽石與黃金！唔及我一片真誠與真心！！！」關秀媚立即被逗笑問：「你幾多歲啊哥哥仔，你竟然會睇我啲戲？你80後㗎 」，司機哥哥興奮回應：「作為多年化骨龍嘅忠實Fans嘅我，我細細個就睇你拍戲啦！精裝追女仔，龍在邊緣，知法犯法，黑馬王子，千王之王！！！離遠已經見到你啦沙律姐」關秀媚大讚司機「盞鬼」，兩人合照留念，司機還表示女神非常親切有禮貌。

依相可見，關秀媚簡約白T恤和牛仔褲，手拖臉頰對鏡甜笑，少女感十足！網民也洗版留言，大讚關秀媚超級凍齡完全看不出年齡：「沙律姐姐超級有女人味」、「佢都真係冇咩點老過仲keep到喎!!!!!」等。