《愛回家》綠葉因身體有缺陷曾被取笑 自爆曾考慮做整形手術被好友一番話釋懷

憑處境劇《愛．回家之開心速遞》演「接龍」行政部主管的「劉德華Andy」而成功入屋的崔錦棠，近日接受演藝人協會的YouTube頻道訪問，表示一出世就沒有隻耳仔，小時候經常被同學取笑，感到十分自卑。

崔錦棠說：「「因為我一出世就有缺陷，一出世都係一個其貌不揚的人，亦都係被取笑嘅人，我同靚仔完全唔掛勾，喺我嘅成長過程中，我唔會有自信，唔會覺得機會從事幕前，因為喺我心目中，演員就靚仔。」

他稱天生右耳有缺陷，一出世就沒有右邊耳仔，小時候會被同學和小朋友取笑 ：「我一直都盡量遮 ，當時我只有耳珠，冇咗上面嗰一部分，所以一直遮住，遮到出嚟做嘢，直到拍《天命》嘅時候， 監製叫我剃頭，我同監製話我剃頭係冇咗隻耳，問佢介唔介意，佢話唔介意，之後開始的時候就坦蕩蕩見人。」

崔錦棠直言最初感到不自在習慣，惟逐漸慢慢適應，直到拍攝《愛．回家》的時候，覺得現在科技進步，曾想過做整形手術，後被監製的一番話而打消念頭：「監製都問我其實有冇需要？佢哋覺得唔需要整，而且因為整咗，都唔知道點樣交代我嘅角色，事實我覺得喺我呢個年紀仲要做咁大嘅手術，要分幾次做，一來我嘅恢復唔好，二來我不可能停工幾個月，咁我都要養家，所以最終冇做。」

他又指拍攝時盡量用左邊面，後來因曾偉權 的說話而釋懷，對其影響甚深：「因為有一次咁啱約咗一個監製傾偈，佢又約咗權權，我講開話想做呢個手術，監製叫我問吓權權有乜意見，權權講呢番話對我很大影響，佢叫我其實唔使介意，你有你自己嘅性格，佢仲舉個例子，當年嘅呂良偉好介意自己嘅疤痕，但最後疤痕就是佢嘅icon，咁樣就令到我很大嘅釋懷。」

崔錦棠續指入行初時不懂得建立一個角色，直至遇上Andy一角才有改變：「拍呢套劇係好舒服，因為我可以隨便改，豐富咗角色，有啲對白係我自己加入去，我都好開心，有啲對白連導演都讚好精警。」

另外，現實中崔錦棠是運動健將，曾代表香港參加田徑、足球及三項鐵人賽，為港爭光，又不時陪藝人練跑。

對此他說：「運動係畀我無限滿足，我嘅所有honor、所有self-respect，所有嘢都係嚟自運動，因為我係一個甚麼都沒有，甚至有缺陷嘅小孩，喺成長過程，第一次受別人尊重，係因為運動嘅成績。」

延伸閱讀：《愛·回家》「Andy」陪兒子練跑 崔錦棠運動健將曾代表香港出賽奪佳績