《中年好聲音2》黃劍文痛心悼念離世外公 貼合照含淚約定「天國見」

黃劍文指外公對他的影響深遠，一直被外公教育男兒有淚不輕彈的黃劍文，難忘第一次見到外公流下男兒淚的時刻：「今日參與公公送別禮悼念安息聚會，公公細個就教我，男人流血不流淚，我最記得第一次見到公公流淚嘅時候，大概九年前，婆婆患咗大病做手術，公公見到婆婆喺醫院好辛苦嘅樣嘅時候，佢忍住冇喺婆婆面前喊，行出病房門口嘅時候，我見着佢崩潰，喊住講，見到婆婆咁樣好陰公，嗰次佢喊到好似細路仔咁。見到公公對婆婆嘅愛好深厚，有時唔會用說話去表達，但係公公嘅行為同行動就知道，佢好愛錫婆婆，男人流血不流淚，但係因為觸碰到愛，就會落淚。」

黃劍文又提到外公外婆先後信耶穌的故事：「婆婆喺大病，康復完之後 因為婆婆經歷到耶穌聽祈禱醫治佢嘅病，當時我開始陪婆婆返教會，而公公亦都一樣 星期日就會陪婆婆一齊去教會。」雖然兩摯親先後離世，不過他就感恩他們能於天國團聚，並指會將外公的教導銘記於心：「公公去天國搵婆婆，我哋遲啲天國見！你教我男人流血不流淚唔好意思 我今日流淚，因為，感謝您喺我生命當中教曉我嘅嘢，你雖然口不會說愛家人但你行動話俾我哋聽 家人嘅重要，你對家人嘅愛，永遠懷念你開懷大笑嘅樣子，係你話俾我聽 你會為我所做嘅 感到驕傲！」網民也紛紛留言送上慰問：「劍文，好好保重！」。