黃博獨家專訪｜黃博親揭奪《中3》冠軍前曾對做歌手無自信 談及老公眼泛淚光：佢從不缺席我嘅活動

自小受到父母熱愛音樂的熏陶，黃博耳濡目染下對音樂結下不解之緣：「細個嘅嘅時候，爸媽每個週末都同好鍾意音樂嘅朋友聚會，大家會玩唔同嘅樂器，仲會唱歌跳舞，我哋亦會叫大人跳舞唱歌，就係被呢個氛圍影響，我開始聽唔同嘅音樂，喺一個好熱愛音樂嘅環境成長。」

由於父母熱愛音樂，最初他們培育黃博學鋼琴，更望她將來能成為鋼琴家，但黃博後來發現自己喜歡的原來是唱歌，「當時多數彈古典音樂，之後自己開始好鍾意流行曲就試下彈，慢慢發覺好似鍾意聽呢啲歌同唱歌多啲。」

擁有彈琴的底子，黃博認為有助其唱歌，全因她認為keyboard是一種有豐富感情兼音色闊，乃是一個很好的樂器培養其音樂感。

雖然最終黃博沒有選擇向鋼琴家之路發展，惟她指父母沒有一絲不快，支持其做喜歡做的事：「佢哋當然都會有自己嘅憂慮，會同我分析有好同唔好嘅嘢再畀意見我，但當我真係有決定嘅時候，佢哋會好支持我。」

正正因為對唱歌有興趣，黃博在22歲時參加內地一個歌唱比賽，惟最終落敗，更被外界抨擊其外表，對其而言，絕對是一大打擊！

她直認最初抱有很大期望，更有一絲想過能否當上歌手：「 雖然明白競爭好激烈，但當面對淘汰嘅情況， 對我嚟講係一個好大嘅挫折，加上自己當時又唔識得點去面對。」

她自言當時年紀尚輕，思想未夠成熟面對挫折，惟隨着年紀增長，心態懂得調節，所謂的着眼點亦會有所不同，總總的經歷令黃博深明到最重要是做好自己。

「我覺得係一個慢慢改變嘅過程，當中包括我曾經去英國留學，完全係一個新環境，冇人知道我鍾意同識唱歌，自己搵咗個電子二手琴喺屋企彈下，慢慢令自己意識到其實上台唱歌，不論係比賽定係表演性質，最緊要做好自己唱好首歌已經足夠，而唔係只專注要做歌手嘅點，不論成功失敗也好，只想穩住自己個心，做好自己應做嘅事。」黃博說。

相隔十多年後，黃博決定參加《中年好聲音3》，原因只是很單純地想自己能否有機會在這舞台上唱歌，「我有睇過中一、中二，佢哋唱咗好多好好聽嘅歌，我當時就諗有冇機會可以喺呢個舞台上唱歌，反而冇特別好大嘅諗法要做歌手定點。」

她憶述：「我記得喺一個週末，我同老公講不如報名海選當玩下，反正週末都冇咩嘢做，不如就去TVB睇下係點，又可以見到一直喺節目入面嘅評審。」

面對一班資深有實力的評審演唱，難免會有所壓力，不過黃博坦言絕無包袱，唯獨只怕自己的廣東話，「因為我從未試過喺一個公開場合講，同埋我完全冇諗過入到海選，只係覺得好開心嚟到呢度唱歌，可以有個好好嘅體驗。」

或者全因心態不同，黃博放膽演繹，最終成功入圍，她直認沒有想過能走得那麼遠，當刻只是盡情享受。

由最初自信心不足的她，在這短短十個月的過程，不但讓觀眾看到其出色的唱功，而且，大家也見到她信心大增，在舞台上散發閃耀的光芒，「我係慢慢適應熟悉呢個環境，因為喺一個陌生環境，我係有恐懼同有刻想匿埋一邊嘅感覺，但之後發現有好多一齊參加比賽嘅朋友出現、好多工作人員和同評審幫自己，就變得愈來愈自在同有信心。」

黃博自言視中3比賽為粵語流行曲課程，不斷挑戰唱廣東歌，勇敢跳出自己的舒適圈，只望不斷求進，「每一個回合比賽就好似學校考試，聽完佢哋意見後， 睇下再下一個回合， 自己會唔會再有進步，絕對係一個好好嘅成長，所以好感激有今次嘅機會。」

不過成為公眾人物，舉手投足也成外界的焦點，甚至要飽受不同的評論，對此黃博早已練成強大「心臟」面對，更深明所有的評論是需要過濾和消化，「有建設性嘅建議，點樣令我做得更好，我係會聽亦好感激佢哋畀意見我； 如果係惡意嘅攻擊，我係會過濾，自己都要識分，邊啲係幫到邊啲係無厘頭攻擊。」

她深知完成比賽後是另一個新開始，不論唱歌或是造型方面，怎樣提升自己，才是應專注的地方，因此她時刻提醒自己即使聽到好的評論，也要保持謙卑的心，不要輕易驕傲。

闖過一關又一關，這條不長又不短的路，身邊一直有老公同行，成為黃博的「定海神針」，她指最初對老公說想參加中3比賽，對方只問她能否承受參賽後會受到不同人的評價，當黃博表示想嘗試後，他便默默地成為其背後的男人，給予其無條件的支持，令黃博甚為感動。

「喺呢十個月比賽入面，佢完全冇講過一句唔支持我嘅說話，我每一日都感受到佢對我嘅支持。佢唔單只係心理上嘅支持， 行動上每一次我比賽佢都喺度，甚至出商場嘅宣傳佢都喺度， 你感受到佢對我永遠係百分百支持。」黃博說。

她指老公深知其出道後有很多事情兼顧，故他在工作空餘時會為其打點一切，盡力令黃博沒有後顧之憂，只需要做自己想做的事，「佢成日諗可以做啲咩幫到我，例如佢會同我嘅粉絲交流或者會想幫我設計啲海報，喺佢能力範圍內支持我，我覺得好感動。」

與老公相愛相知，由工作同事的夥伴，變成一生的伴侶，黃博直認與老公同樣覺得平平淡淡，過好每一日每一刻，大家互相扶持，成為對方最大的依靠，已是最幸福的事。

雖然老公永遠是自己的最強粉絲，惟黃博指對方亦並非會盲撐，「例如我咬字唔好，佢會提我再練；有時快歌，佢會覺得我表現仲未夠放開，會叫我放膽啲，佢係會畀幫到我嘅意見。」

言談間感受到黃博對老公的感激之情，亦看到二人相處簡單就是愛，「每日生活入面，互相關心對方工作同生活，踏實做好每一件事同過好每一日就係我哋嘅想法。」