御用大隻佬近況曝光 親揭照顧自閉兒子經濟有困難 直認擔心仔仔將來：照顧唔到佢哋一世

現實中鄭健樂Rocky為兩子之父，大仔現年17歲，細仔16歲，兩名均患有輕度自閉症，細仔兼有過度活躍症及專注力不足，同樣在兩歲進行檢測時發現。

為了照顧兩位愛子，他曾一度離開幕前工作，擔任私人健身教練，騰出時間照顧仔仔。

鄭健樂Rocky曾接受傳媒訪問說：「照顧佢哋要多付出耐性同時間，因為佢哋表達能力與同齡小朋友唔同，有時都要了解同感覺佢哋需要啲咩。」

談到現時兩位兒子近況，鄭健樂Rocky接受tvb.com訪問說：「大仔依家跟我，細仔就跟前妻。（經濟上有冇困難？）的確有，因為始終單親一個人搵錢，要交租亦要出糧畀工人，所以要努力搵多啲錢。」

不過鄭健樂Rocky直言與愛子關係十分好，即使現時他們的階段屬於反叛期，惟二人也十分乖巧，「佢哋嘅思想都仲係好小朋友，鍾意留喺屋企打機。」

問到會否擔心兒子的將來發展，他直認作為父母一定會擔心：「依家就唔係話好擔心，因為佢哋依家都好乖，但有時我都會諗自己照顧唔到佢哋一世，將來佢哋會點呢？呢樣嘢一定會擔心。」