:quality(80)/public/tvbcom/article/images/202607/86a24afa-42ec-408c-87ec-00a472584b73.png)
Sherman潘靜文推出全新單曲《遺憾還是會完》，繼《永遠的潘朵拉》及《傷魚座》後，相隔兩年推出新歌，延續傷心情歌的路線，不過今次增添了一份成熟，對感情、人生的看法也有些感悟，她說：「自己話大唔大，話細唔細都已經28歲，我覺得每個人都會有一啲遺憾，可以係細到旅行有個景點去唔到；又可能大到係拍咗十年拖都唔可以開花結果，又或者單戀咗好耐，粒種子都未萌牙就已經要結束。人人都有不同嘅遺憾，其實我自己都有啲未能完全放低嘅事或人物，所以今次份詞都係出自己嘅真實經歷。」
Sherman又分享今次錄音找到些小秘訣，她說：「第一次去錄音嘅時候我覺得自己都未入狀態，到第二次嘅時候，我著咗對平底嘅波鞋同埋食咗飯先過去，我發覺原來真係要有米氣到肚先夠力去唱，哈哈！」
Sherman一向都身形纖瘦，但她竟然要為今次MV特意減肥，她說：「拍MV之前我拍咗個飲食節目同去旅行，重咗3KG呀！為咗喺MV入面個人唔好咁脹，開拍之前一個禮拜冇食晚餐，連我最鍾意嘅汽水都冇飲，戒糖加埋打網球，好快減咗2KG，希望以最好嘅狀態去拍。」
