洪永城心痛太太產後身體變弱 大方自爆做咗呢個手術

雖然洪永城未有詳細解釋原因，惟在訪問中，梁諾妍直認生完第二胎後身體變弱：「因為家姐出世時已經係3年前，3年後再生第二胎時年紀已經大啲，康復期好似要耐啲；同埋我陀二胎嘅時候，我係有好多病痛。」

洪永城亦十分心痛太太：「係比第一胎多咗好多，的確可能會令身體上弱咗少少。」梁諾妍又指會盡量吃多些補充品，令身體盡快復原，並要勤力做運動：「雖然係冇之前20幾歲咁精神同健康，但我覺唔差嘅，好多朋友話我仲Keep得好好，好後生，我都開心嘅。」

其實梁諾妍生完第二胎先後入過三次醫院，第一次是去年5月，因為乳線炎令其持續發高燒至39.7度；去年8月，梁諾妍發現大腿附近「生咗粒瘡」，因為天氣炎熱加上跑步令傷口受到感染，要入院開刀放受感染瘀血。

今年4月，梁諾妍再透露「又生咗粒嘢，又做咗個手術」，自覺「好弱雞」又發燒及低血壓，令不少朋友也十分擔心。

即使生小朋友很辛苦，湊小朋友亦要付出很多心力，惟洪永城和梁諾妍也認為一切也值得的，因為兩位女兒的出現帶給家庭很多歡樂，兩姊妹能夠一起成長，將來亦可以互相照顧。