汪明荃澳門開騷獻唱多首經典名曲 感激觀眾支持擁護58年：我要不斷改進同增值

汪明荃（Liza姐）日前的《阿姐Diva汪明荃演唱會2025》澳門站完美落幕，全場爆滿，場面熱鬧。

Liza姐一出場先唱出《閃爍登場》和《迷人PINK LADY》，更與澳門、香港和內地的觀眾打招呼，又指上次來澳門開騷是2022年，「我記得嗰陣時係要隔離14日，先可以出嚟唱歌。」

Liza姐再介紹今次海報的Logo甚有意思，「由左至右讀就係英文嘅 DIVA，但係你當睇中文又得喎，係寫住《阿姐》，所以我覺得呢個 logo 設計得好特別。」又指不論甚麼名字身份也好，只想將最好一面呈現給觀眾。

之後，她再唱出多首電視劇經典名曲包括《天虹》、《金絲雀》、《秋海棠》、《京華春夢》和《用愛將心偷》，又自言十分感恩大家能透過這一些作品認識她，「嗰陣時拍劇通告日接夜，夜接日，都幾辛苦，但亦都好感恩透過呢啲作品拍咗好多好嘅劇，令到大家認識我，係呢幾十年大家都好支持我汪明荃。」

換過另一套全紅色的服飾後，Liza姐為大家一口氣唱了《銀河》、《華麗轉身》及《傾城之戀》，又獻唱鄧麗君的國語歌曲包括《甜蜜蜜》、《夜來香》、《月亮代表我的心》和《路邊野花不要採》。

隨後，羅家英出場即大搞爛gag：「好嘢，冇得頂呀，不過阿姐唱歌嘅內容令我好心驚，你叫我路邊野花不要採吖嘛。」Liza姐即指對方對號入座，羅家英則說：「聽你話所以我路邊野花不要採，我就採我嘅家花。」此時他更拿出一枝玫瑰花送給Liza姐，並問觀眾：「大家認為我係咪一個合格嘅老公？」台下掌聲不斷，Liza姐：「嘩，好多人撐你，大家畀多啲掌聲家英哥。」家英哥：「證明你有眼光搵到個好老公。」

兩人在台打情罵俏，Liza姐到後台換衫，家英哥說：「其實太后搵我唱歌嘅原因係乜嘢呢？大家知唔知呀？因為我靚仔？想介紹老公比大家識？梗係唔係啦，因為太后帶咗好多靚衫嚟，咁啲靚衫係攞嚟換嘅，咁換衫就需要時間，咁呢個時間搵邊個去《襯》呢？咁梗係搵老公去做啦！」

接着家英哥回復正經說：「每逢4月1號我都好掛住一個朋友，掛住張國榮，我同佢一齊做過好多套戲，包括《金玉滿堂》同《色情男女》等等，同時佢對粵劇都好有興趣，得閒果陣佢成日問我啲做手係點，轉個身睇下，揈個水袖睇下，哥哥經常同我傾呢啲計，所以我哋好多嘢講。」之後唱出儂本多情》。

再換過一身翡翠綠服飾的Liza姐在舞蹈員伴舞下獻唱了由《辛棄疾 - 青玉案 • 元夕》、《蘇軾 - 蝶戀花 • 春景) 和《李清照 - 聲聲慢）組成的宋詞組曲，之後她說：「我對藝術嘅追求絕對係無分國界，無論古今中外，只要係出色嘅我都有興趣學。」

尾聲時，Liza姐唱出《家變》並說：「當時我飾演女主角洛琳，佢係劇入面嘅髮型同時裝都有好多女仔鍾意，而女強人呢三個字亦都係因為呢套劇先開始有，其實拍劇有機會唱好歌同拍到一部好嘅劇之外，亦都有好多機會同靚仔合作，好似四哥謝賢、周潤發、秋官、任達華、林子祥同劉松仁。」

最後她感謝演唱會團隊，還有觀眾多年來的支持：「最重要係多謝大家對我嘅支持，因為我唔知仲可以唱幾多次，所以非常感激每一次演唱會入場嘅觀眾，多謝你哋支持咗我58年，聽番呢啲歌自己都非常感動，因為呢啲歌可以唱咗幾十年，同埋觀眾都係咁擁護我。」

在Encore時，Liza姐送上《熱咖啡》後說：「今日係歌手，聽日可以係粵劇演員，我亦都有去做一啲行政嘅工作，為業界做貢獻，每一個崗位我都盡心盡力去做，因為我知道大家對汪明荃係有好高嘅期望，有好多要求，所以我係要不斷改進同增值，係呢度要多謝你哋嘅支持，陪我一齊行呢條娛樂之路。」唱畢演唱會主題曲《Make my day》後，Liza 再度邀請家英哥出現在台上，他倆合唱了《萬水千山總是情》，並為今次演唱會澳門站劃上完美句號。

延伸閱讀：友乜唔講得丨汪明荃大方分享最不喜歡羅家英的一個壞習慣 阿姐爆謝賢拍《千王之王》突然中途離場收工