李家鼎激讚李泳豪夫婦悉心照顧 澄清紅顏知己Viva管控財產傳聞：完全唔合邏輯

李家鼎（鼎爺）早前經歷家庭風波後，經過一段時間的休養，心情已漸趨平復，亦逐步回復精神。日前，他接受 TVB娛樂新聞台 獨家專訪，隨即吸引大批網民與觀眾留言為他打氣。

延伸閱讀：李家鼎淚揭與施明離婚真相 未見最後一面成此生最痛：我永遠愛佢 目前增磅狀況回穩

鼎爺在最新的下集訪問中表明，雖然已狠心與長子李泳漢斷絕關係，但幸好一直陪伴在側的細仔李泳豪（豪仔）處理得宜，成功阻止事件繼續惡化。

財政大權交由兒子兒媳 鼎爺拒沾賭錢寄情盆栽雀仔

鼎爺坦言，豪仔同樣歷經喪母與兄弟鬩牆之痛，心情一樣難受，但豪仔未有選擇正面硬碰，而是選擇與他並肩忍耐：「豪仔好孝順，不枉我錫佢，但有陣時佢唔開心會夾硬忍，譬如我食嘢唔聽話，或者我講嘢over咗，佢覺得會容易得罪人。佢變咗係長者，（同細新抱）悉心照顧我，好似當我係佢哋仔女咁。」

他續說：「依家財政同各樣嘢都係豪仔同細新抱幫我打理，發言權都喺佢哋度。攞錢會同佢哋講，幾時幾日我攞幾多錢幾多萬，你同我搞掂佢啦！」鼎爺又指自己生活其實相當樸素，且對金錢看得透：「不嬲我都唔亂使錢，其實養我呢個老人家最簡單，打麻雀、啤牌、鋤大D、牌九我咩都識，但我冇興趣。我樣好百厭，但我可以幾日淨係搞盆栽同雀。我覺得賭錢贏就騎騎笑，但贏咗落袋最多七成，又要威又要請人食飯，但輸就輸到入肉。咁辛苦捱更抵夜做武師打到骨都歪埋，輸咗仲要被人話係魚腩。」