李司棋遊貴州享受慢活人生 自帶手工刺繡民族服打卡

現年74歲嘅李司棋，近年雖然因為聽力出現問題而逐漸減少幕前工作，不過依然保持積極樂觀嘅心態，間中仲以鬼馬造型同大家見面，早前佢喺安老服務嘅廣告中飾演一位退休空姐，輕鬆詼諧嘅演繹方式令人眼前一亮，大受觀眾歡迎。

司棋姐近年亦相當活躍於社交平台，經常分享自己嘅生活點滴，經常更會教大家烹飪各種美食同煲靚湯，精湛廚藝俘虜咗唔少粉絲。日前，司棋姐抽空同一班好友去到貴州旅行，放慢腳步，享受難得嘅慢活人生。

今次貴州之旅，司棋姐同友人參觀咗當地唔少著名景點，更融入當地文化，入鄉隨俗地換上各式各樣顏色鮮艷、圖案精緻嘅民族服飾打卡留念。原來其中一套服裝係司棋姐喺出發前特別訂購，當中嘅刺繡精美細緻，手工精湛，令佢非常喜愛，更表示即使拍完照打完卡都唔捨得留低當地，最終決定將服裝帶返香港作為紀念品。不過，與服裝配套嘅頭冠就送返畀當地嘅租衫舖老闆娘，當司棋姐親手交上頭冠時，對方即刻露出滿足而感激嘅笑容，呢一幕溫馨情景令司棋姐深感難忘，亦為呢次旅程增添咗特別嘅意義。