日本作為港人出遊首選國家之一，也備受藝人們歡迎，早前孫慧雪就帶著老公和小朋友一起去日本影了輯全家福，美人美景令網民大飽眼福，紛紛表示也想去當地影一輯！而最近的櫻花季更是吸引了大量旅客來到日本旅行，賞櫻打卡，樂而忘返。不過，打卡的同時可不能忘記守禮，做個有品旅客呀！今日（15日），方健儀就在社交平台抨擊胡亂搖晃櫻花樹的無品遊客！
事關方健儀前兩個星期與老公去到日本遊玩，本來有得歎美食、賞靚景，心情大好，但卻因眼前一幕激氣！她上傳了三位旅客為影靚相而大力搖晃櫻花樹，從而讓櫻花花瓣飄落下來的影片，並寫明事情經過：「事發喺京都，洪生與我喺餐廳準備食晚飯，隔著寬大嘅玻璃，見到遠處有一群難以辨認國籍嘅男女，在河邊同櫻花合照時，竟猛力搖晃櫻花樹枝，花瓣如雪片般掉下，營造落櫻浪漫效果。呢班人冇收手，再搖、三搖、四搖、五搖，chok到樹枝都散，棵櫻花好慘好慘。」
方健儀坦言雖然已回到香港一禮拜，但心中怒火仍未熄滅，她也直言自身看法：「其實，無論喺自己地方，或人哋地方，保護公物呢啲由細到大都講到打喊路嘅普世價值，永遠都會遇到，見到。但最可怕嘅係，當你糾正別人做法時，有人會合理化歪道，我試過紅葉季節見到有人摘紅葉，對方竟話『摘樹葉都係一兩片唧』、『啲葉唔摘遲早都跌』。」如此出格言論，令方健儀相當無奈和難過，她感慨道：「有人問過我，覺得世上最可怕的是甚麼動物，我毫不猶豫答：『人類』。但我深信，在這可怕群體中仍然有善類，我會繼續選擇做正確及善良的事，希望大家都擁抱上天給我們的美景，別走向歪道，也別合理化歪道。」大家欣賞美景的同時，也要愛護大自然，珍惜我們生活的家園。
