張與辰獨家專訪｜張與辰自爆童年避債搬屋無數次 親揭情史哭訴愛得太遲 ：冇機會再同佢講

在舞台上看到張與辰展現自信，放膽演出的一面，惟他自言內裏為人自卑，一切源於其家庭成長的關係，「爸爸喺我細個嘅時候爭咗好多賭債，佢好早就離開咗屋企，嗰陣時聽到身邊朋友或者鄰居一啲唔好嘅說話，因為媽咪當時做駐唱歌手，佢哋覺得出嚟唱歌嘅人就係舞女，覺得舞女唔識教仔，變咗佢哋嘅仔女聽到後喺學校都會有樣學樣去笑同蝦我，佢哋會話『佢冇阿爸，佢媽咪係做舞女，唔好同佢玩』，變咗我喺學校都係自己一個。」

童年生活絕不易過，張與辰不但曾試過一個白麵包吃足幾天，家人為了怕債主找上門，故不時搬家，在短短幾年整個西馬也住過，直至長大後的他回想這段東奔西走的日子，想不到當時其母親是怎樣撐起整個家。

即使面對朋輩的欺凌，張與辰從來沒有一絲責怪母親的心，更一直當對方是其偶像，「我從來冇埋怨過媽咪點解要做歌手唱歌賺錢養家，而我今日會做歌手都係因為佢，我一直覺得媽咪企喺台上好靚，唱歌好好聽，反而我係為佢感到驕傲。」

成長的經歷加上長大後遇到的挫折，令其自信心愈來愈低，「我會覺得自己唔好，包括感情同音樂上都係一樣，唔配擁有美好嘅嘢。」

張與辰親揭一段刻骨銘心的感情經歷，令其留下一生的遺憾，至今仍未能忘懷，成內心深處永恆的傷疤。他憶述：「嗰時我喺一間紅酒吧做駐唱，佢係做侍應，一開始我哋成日窒嚟窒去，好似歡喜冤家，後來間酒吧執咗，之後大家就冇再見。」

或者緣份就此埋下種子，他們再在桌球室重遇，自此二人保持聯絡，他指有一刻曾想過對方是否喜歡自己，「自己都有諗係咪鍾意咗佢呢？但之後諗唔好搞咁多嘢，若果佢真係鍾意我就會同我講，自己亦都唔敢踏出呢一步。」

隨後張與辰指有數天收不到對方的訊息，甚至打電話也沒有人接聽，突然人間蒸發，「嗰時我就諗可能佢唔鍾意我，所以唔理我，之後我嘅結他手朋友知道呢件事後，佢攞咗份報紙畀我睇，原來佢一家人意外走咗。」

他流下男兒淚痛心地說：「呢個係我人生一個好大遺憾，我覺得我係爭咗佢，因為我唔知佢係咪真係鍾意我，同埋我冇及時話畀佢知道我鍾意佢，就係因為我冇表達到而令到呢件事永遠都冇機會再同佢講。」

人生無常，愛情和遺憾正正並存，張與辰沒想過有些人一轉身，從此天人永隔，這個遺憾令張與辰至今猶如絡印刻在心中，對感情事不渴望不強求，「今時今刻我唔會太渴望有婚姻、感情，咁多年嚟呢樣嘢唔係我最睇重嘅事，所以不如專心做好我應該做嘅事，就係用自己嘅影響力回饋畀社會，令到大家可以過得更好更美麗。」

雖然現時張與辰事業起飛，成功推出個人廣東話專曲，獲不少粉絲支持，但在這條音樂路上他絕對波折重重，更曾一度患上抑鬱症，幸好其身邊的朋友一直對其不離不棄。

「因為嗰段期間我成日會發脾氣，成個人好憤怒，我會將啲憤怒發洩喺我身邊嘅朋友身上，但佢哋一直都喺我身邊支持、守護、照顧同陪住，所以嗰時最辛苦唔係我，而係我身邊嘅人。」張與辰說。

張與辰回想昔日最差的情況，經常胡思亂想，總覺得有人要害他，「我覺得身邊嘅朋友對我都有企圖，情緒好唔穩定，就算當時食8粒安眠藥都瞓唔着，完全唔知自己做緊咩，出咗街唔知自己出咗街，甚至乎會傷害自己，嗰段期間係好危險，所以好感恩我仲喺度。」

他指慶幸身邊有幾位朋友將其在低谷裏拉上來，成為其漆黑中的一點光，當中一位是其恩師戴佩妮，「佢打咗幾個電話畀我，佢話細佬，有啲乜嘢係阿姐可以幫得你？我話我真係好想唱歌，好想留喺台北唔想咁就返去，佢話你想唱歌，咁你寫嗰啲歌畀我聽吓，我話畀你知究竟邊度寫得唔啱嘅地方。」

張與辰指對方叫他可將自己寫的歌曲賣出去，這樣便可以有收入，「佢同我講唔好諗唱歌住，先諗下究竟要點樣去維持生活，所以我畀晒啲歌佢，佢教咗我好嘢，佢真係花咗好多心思，逐首歌話畀我知邊度寫得唔好；而且戴佩妮仲借錢畀我租屋。」

就是戴佩妮無私的幫助，令張與辰重新振作，努力賺錢，「我喺好短時間，將我寫歌同埋製作嘅能力加強咗，我最終亦還番錢畀佢，而我都喺嗰段時間成功做咗個音樂會，我慢慢跳番出嚟，發覺呢個世界真係有班好支持同真心想幫我嘅人，我好感激佢哋。」

每個人都有軟弱想放棄的時候，張與辰亦毫不例外，他直言曾想過放棄音樂，然而《中年好聲音3》這個比賽是其給自己最後一次的機會，若不成功就會轉行，「我最初已經同屋企人講咗2026年會返嚟馬來西亞，打算同屋企人做番屋企生意，又諗住將自己呢20年識嘅流行音樂轉變成福音歌，放上網同大家分享。」

不過正正有此想法的時候，張與辰的朋友看見《中3》的比賽，更叫他不如嘗試參賽，「我話你畀份表格我咪填，最尾佢真係喺最後嗰一日最後嗰一鐘send過嚟畀我，我填完後就接到海選電話，就係咁樣一步一步行到今日。」

他直言從來沒想過能走到今時今日，時刻保持做好自己的心態，「每一回合我只諗一樣嘢，就係點樣將呢首歌改變成自己嘅歌，輸贏對我嚟講真係冇諗太多，所以我好感恩，可以行到最尾攞埋嗰獎，有一個好靚嘅成績單，令我可用生命故事去影響身邊嘅人，話畀大家知道其實呢個社會真係好美，唔係大家所諗嘅咁灰同冇希望。」